Dar es Salaam. Mwanadada anayefanya vizuri kwenye tamthilia ya Huba, Nasma Hassan Athumani ‘Nanadollz’ amewatolea uvivu mashabiki waache kufuatilia maisha ya watu na wapambane na ndoto zao ili wafanikiwe.
Nanadollz ameyasema hayo siku chache baada ya kutolewa maneno na mashabiki juu ya mafanikio yake, huku akiwataka wayachukulie kama chachu ya kufanikisha mambo yao na si kwa ubaya.
“Naomba mfuatilie kazi zangu na kuchukua mazuri yangu ili yawajenge. Pia mafanikio yangu yawe chachu kwenye kupambana ili mtimize ndoto zenu, acheni kuwa na chuki na roho mbaya hamuwezi kutoboa,” amesema na kuongeza;
“Siweki wazi mafanikio yangu ili kuwaumiza ua kuwaringishia, nafanya hivyo ili kuwaonyesha hakuna kinachoshindikana na kuwapa hasira za kupambania ndoto zenu, lakini nyie mnabeba tofauti na kunitupia maneno machafu.”
Nana amesema hatayumbishwa na maneno na amejidhatiti kuhakikisha anafikia malengo yake na ataendelea kuweka wazi mafanikio yake bila kujali nini kitazungumzwa juu yake.
“Unajua mashabiki sio wote wanapenda mafanikio ya mtu, hivyo naamini kuna wanaopata hasira kwa mafanikio yangu na wanapambana ili waweze kufikia yao lakini kuna wengine hata bila sababu wananishushia maneno makali na kuona mawaringishia yale ninayoyapata, siyo kweli. Sanaa yangu ni sehemu ya kuwaelimisha wanaonizunguka hata wanaonifuatilia. Anayetaka kuyachukua achukue.”