BARCELONA, HISPANIA: LICHA ya kuonyesha nia ya kuendelea kusalia Barcelona na kusaini mkataba wa kudumu, ripoti zinadai Paris Saint-Germain imeingia kwenye kinyang’anyiro cha kumsajili mshambuliaji Marcus Rashford dirisha lijalo, jambo ambalo linaweza kuharibu mipango huko Catalonia.
Rashford ambaye ameonyesha kiwango bora tangu ajiunge na Barcelona dirisha lililopita la majira ya kiangazi kwa mkopo wa msimu mmoja kutoka Manchester United, ametoa jumla ya pasi tisa za usaidizi wa mabao katika mechi 17 za michuano yote.
Kiwango hicho kimelivutia sana benchi la ufundi la Barca ambalo limeidhinisha mpango wa fundi huyo kusaini mkataba mpya na jambo zuri ni timu hiyo ina nafasi ya kufanya hivyo kwa kulipa Pauni 28 milioni, kiasi ambacho kiliwekwa katika makubaliano baina yao na mashetani wekundu.
Hata hivyo, sasa mambo yanaweza kuwa magumu kwa Barca kwani PSG inaonekana kuhitaji sana huduma yake na ipo tayari kutoa hadi Pauni 44 milioni kama ada ya uhamisho ili kuishawishi Man United iwauzie wao badala ya Barca.
Ripoti kutoka tovuti ya Fichajes zinadai ofa ya PSG imewachanganya mabosi wa Man United ambao sasa wanafikiria kubadili maamuzi yao na kutaka kumpeleka staa wao kwa matajiri hao wa Jiji la Paris.
PSG inamwona Rashford mchezaji ambaye ataboresha sana eneo lao la ushambuliaji na anaendana sana na mfumo ambao kocha Luis Enrique anautumia.
Hata hivyo, PSG tayari ina ushambuliaji nyota wengi kama Ousmane Dembele, Khvicha Kvaratskhelia na Desire Doue ambao pia wapo katika kiwango bora kwa sasa lakini bado mabingwa hao wa Ufaransa wanataka zaidi kuongeza makali katika safu yao ya ushambuliaji.