Rais wa Guinea-Bissau aliyeondolewa madarakani siku chache zilizopita na jeshi la Taifa hilo, Umaro Sissoco Embalo amekimbilia Senegal baada ya kuachiliwa na vikosi vya kijeshi vilivyompokonya madaraka.
Rais Embalo ambaye ni jenerali wa zamani wa jeshi, aliingia madarakani 2020, alipinduliwa baada ya uchaguzi wa Taifa hilo kukamilika wakati akisubiri kutangazwa kwa matekeo na tume ya Taifa ya Uchaguzi ya Taifa hilo.
Taarifa iliyotolewa na mamlaka ya Senegal imetangaza kuwa uamuzi huo umefanyika baada ya mazungumzo na kambi ya kanda ya Afrika Magharibi Ecowas uliopendekeza kupatikana kwa uhamisho wa kiongozi huyo katika kipindi hiki ambacho mvutano umeongezeka nchini mwake.
Wizara ya Mambo ya Nje ya Senegal imethibitisha kuwa kiongozi huyo tayari amewasili salama nchini humo ili kulinda usalama wake.
“Amewasili salama kwa ndege ya kijeshi iliyokodishwa siku ya Alhamisi muda mfupi baada ya kuachiwa kutoka mikononi mwa vikosi vya usalama wa Taifa hilo,” imeeleza taarifa hiyo.
Wakati hayo yakiendelea Jeshi la Taifa hilo limemuapisha kiongozi mpya wa mpito, Jenerali Horta N’Tam, ambaye ataitawala nchi kwa muda wa mwaka mmoja.
Jeshi hilo pia limesitisha mchakato wa uchaguzi na kuzuia kutolewa kwa matokeo likieleza kuwa limechukua hatua hizi ili kuzuia njama ya wanasiasa ambao wanadhaniwa kuwa wanaungwa mkono na mfanyabiashara mmoja maarufu ili kuyumbisha nchi.
Hata hivyo viongozi wa Ecowas wamesimamisha Guinea-Bissau kwenye vyombo vyote vya maamuzi hadi utaratibu wa katiba urejeshwe.
Imeandikwa na Elidaima Mangela kwa msaada wa Mashirika Habari.