Dar es Salaam. Mahakama Kuu Masjala Ndogo Dar es Salaam, leo inatarajiwa kutoa uamuzi wa shauri la madai ya kudharau amri yake linalowakabili viongozi wa Chama cha Demokrasia na Maendeleo (Chadema) wakiwemo Makamu Mwenyekiti Bara, John Heche na Katibu Mkuu, John Mnyika.
Uamuzi huo unatarajiwa kutolewa leo Novemba 28, 2025 na Jaji Awamu Mbagwa aliyesikiliza shauri hilo, baada ya kushindwa kuutoa na hivyo kuahirishwa mara mbili mfululizo kutokana na kutokukamilika kuuandika.
Shauri hilo la madai mchanganyiko namba 25480 la mwaka 2025 linatokana na kesi ya kikatiba inayoikabili Chadema, kuhusiana na mgogoro wa mgawanyo wa rasilimali za chama hicho baina ya Bara na Zanzibar inayosikilizwa mahakamani hapo.
Kesi hiyo ya msingi namba 8323 ya mwaka 2025 imefunguliwa na Said Issa Mohamed, Makamu Mwenyekiti mstaafu wa Chadema, Zanzibar na wajumbe wa Bodi ya Wadhamini wa Chadema kutoka Zanzibar, Ahmed Rashid Khamis na Maulida Anna Komu.
Walalamikiwa katika kesi hiyo inayosikilizwa na Jaji Hamidu Mwanga ni Bodi ya Wadhamini Waliosajiliwa wa Chadema na Katibu Mkuu wa chama hicho.
Walalamikaji hao wamefungua shauri hilo la madai dhidi ya makamu mwenyekiti wa chama hicho, John Heche, katibu mkuu John Mnyika na wenzao wengine wakiwataka wajieleze ni kwa nini wasifungwe kama wafungwa wa madai, kwa kudharau amri ya mahakama hiyo.
Mbali na Heche na Mnyika, wajibu maombi wengine katika shauri hilo la madai ya kudharau amri ya mahakama hiyo ni Rose Mayemba, Brenda Rupia, Hilda Newton, Twaha Mwaipaya, Gervas Bernard Lyenda, Wadhamini waliosajiliwa wa Chadema na Katibu Mkuu Chadema.
Wote wanadaiwa kuidharau mahakama hiyo kwa kukiuka amri yake iliyoitoa ya zuio dhidi ya wadaiwa katika kesi hiyo ya msingi kutokufanya shughuli za kisiasa na kutumia mali cha chama mpaka kesi hiyo itakapomalizika.
Chanzo cha shauri hilo
Awali waombaji na walalamikaji katika kesi ya msingi walifungua shauri dogo la maombi ya zuio la muda dhidi ya walalamikiwa, wakiiomba mahakama hiyo itoe amri ya kuwazuia kufanya shughuli zozote za kisiasa na kutumia mali za chama mpaka kesi hiyo ya msingi itakapoamuliwa.
Juni 10, 2025 Mahakama hiyo katika uamuzi wake ilikubaliana na hoja za walalamikaji ikatoa amri hizo za zuio kama walivyoomba.
Hata hivyo, waombaji katika shauri hili la kuidharau mahakama wanadai kuwa wajibu maombi wamekuwa wakikiuka amri hiyo, huku katika kiapo chao pamoja wakitaja tarehe mbalimbali za matukio wanayodai wajibu maombi wamekuwa wakifanya shughuli za kisiasa waliozuiliwa.
Wajibu maombi kwa upande wao waliwasilisha pingamizi la awali wakipinga uhalali wa shauri hilo la kuidharau mahakama, huku wakitoa sababu mbili.
Kwanza wanadai kuwa kuna mgongano wa masilahi kwa wakili wa waombaji wakidai kuwa ndiye aliyeshughulikia upatikanaji wa ushahidi wa kielektroniki unaodaiwa wa wajibu maombi kukiuka amri ya mahakama.
Pia, wanadai kuwa shauri hilo limefunguliwa nje ya ukomo wa muda wa kisheria wa siku 60 na tatu wanadai kuwa amri ya mahakama inayodaiwa kukiukwa inawahusu wadaiwa kwenye kesi ya msingi pekee.
Mahakama ilisikiliza pingamizi hilo kwa pamoja na shauri la msingi, la kuidharau mahakama, Oktoba 28, 2025.
Hivyo katika uamuzi wake leo mahakama itatoa kwanza uamuzi wa pingamizi hilo, ambalo uamuzi wake unaweza kuathiri uamuzi wa shauri la msingi, la kuidharau mahakama.
Iwapo mahakama itakubalina na hoja za pingamizi la wajibu maombi maana yake italitupilia mbali shauri hilo la msingi na mambo yote yataishia hapo kwani haitalazimika kutoa uamuzi wa shauri la msingi.
Lakini kama mahakama haitashawishika na hoja za pingamizi hilo basi itatupilia mbali pingamizi hilo kisha itaendelea na uamuzi wa shauri la msingi kwa kuzingatia hoja za pande zote.
Kama haitashawishika na hoja za waombaji basi italitupilia mbali shauri hilo na wajibu maombi watakuwa huru.
Kinyume chake kama mahakama itashawishika kuwa waombaji wamethibitisha madai yao kuwa wajibu maombi wamekuwa wakikiuka amri yake, basi inaweza kuamuru wajibu maombi hao wafungwe kama wafungwa wa madai kama waombaji walivyoomba.
Katika kesi ya msingi ya malalamiko ya mgawanyo wa rasilimali, walalamikaji wanadai kuwa Walalamikaji wanadai kuwa kumekuwa na mgawanyo usio sawa wa mali za chama na rasilimali za kifedha kati ya Tanzania Zanzibar na Tanzania Bara, kinyume na Sheria ya Vyama vya Siasa na Katiba ya chama hicho.
Pia, wanadai kuwa kuna ubaguzi wa kidini na kijinsia; pamoja na kutoa maoni na matamko yaliyo na nia ya kuvuruga Muungano kati ya pande mbili za Jamhuri ya Muungano wa Tanzania.
Hivyo wanaiomba mahakama hiyo itamke kuwa wadaiwa wamekiuka kifungu cha 6A(1), (2), (5) cha Sheria ya Vyama vya Siasa, Sura ya 258 Marejeo ya mwaka 2019 na iwaelekeze wazingatie kifungu hicho.
Pia, wanaiomba Mahakama hiyo itamke kwamba ugawaji wa fedha, mali na rasilimali kwa ajili ya shughuli za kisiasa na kiutawala kati ya Tanzania Bara na Tanzania Zanzibar unaofanywa na wadaiwa ni kinyume cha sheria na ni batili.
Vilevile wanaomba mahakama isitishe kwa muda shughuli zote za kisiasa mpaka maagizo ya Mahakama yatakapotekelezwa na zuio la kudumu dhidi ya matumizi ya mali, fedha na rasilimali za chama hadi walalamikiwa watakapotekeleza matakwa ya sheria husika na gharama za kesi.
Walalamikiwa wameibua pingamizi wakihoji uhalali wa kesi hiyo ambayo ina madai ya Kikatiba kusikilizwa na jaji mmoja badala ya jopo, pingamizi ambalo mahakama imeelekeza lisikilizwe kwa njia ya maandishi.
Kesi pia itatajwa leo kwa ajili ya kupanga tarehe ya uamuzi wa pingamizi hilo.