DRC. Serikali ya Tanzania imeendelea kupanua wigo wa masoko ya mazao ya nafaka katika ukanda wa Afrika ya Kati, baada ya Naibu Katibu Mkuu wa Wizara ya Kilimo anayeshughulikia Maendeleo ya Mazao na Usalama wa Chakula, Dk Stephen Nindi kutangaza kuwa Wakala wa Taifa wa Hifadhi ya Chakula (NFRA) uko tayari kuimarisha ushirikiano na CRDB Congo.
Akizungumza mwishoni mwa wiki katika Ofisi za CRDB zilizopo mkoani Haut Katanga, DRC, Dk Nindi amesema hatua hiyo inalenga kuhakikisha wananchi wa Congo wananufaika zaidi na upatikanaji wa nafaka kutoka Tanzania, sambamba na kuimarisha biashara baina ya nchi hizo mbili.
Katika mazungumzo hayo, Dk Nindi ameongozana na Balozi John Ulanga, Mkurugenzi wa Idara ya Diplomasia ya Uchumi katika Wizara ya Mambo ya Nje na Ushirikiano wa Afrika Mashariki, ambaye pia ni Mwenyekiti wa Bodi ya Ushauri ya NFRA, pamoja na Dk Andrew Komba, Ofisa Mtendaji Mkuu wa NFRA.
Ujumbe huo wa Tanzania, uliopo nchini DRC kwa ziara ya kikazi, umejikita katika kutafuta njia za kuimarisha ushirikiano wa kibiashara kati ya NFRA na Wizara ya Uchumi, Biashara, Uchukuzi na Utalii ya Jimbo la Haut-Katanga.
Katika mazungumzo maalumu na Waziri wa Wizara hiyo, Lauraine Lusamba amesema pande zote mbili zilikubaliana kuandaa ziara ya ujumbe maalumu wa wafanyabiashara na viongozi wa Haut-Katanga watakaotembelea maghala ya NFRA nchini Tanzania.
Aidha ziara hiyo itafungua njia ya kusainiwa kwa mkataba rasmi wa biashara ya nafaka baina ya NFRA na serikali ya jimbo hilo.
“Mahitaji ya nafaka katika jimbo hili ni makubwa, hususan kutokana na wimbi la uwekezaji wa migodi unaoongezeka. Tunachukua fursa hii kuhakikisha Tanzania inakuwa mshirika mkuu wa kuhakikisha usalama wa chakula,” amesema Dk Nindi.
Jimbo la Haut-Katanga, ambalo lina utajiri wa madini, limekuwa kivutio kikubwa cha wawekezaji wa kimataifa katika sekta ya uchimbaji. Kufuata ongezeko la idadi ya watu na shughuli za kiuchumi, mahitaji ya nafaka yamekuwa makubwa kuliko uwezo wa uzalishaji wa ndani, hivyo kufanya Tanzania kuwa chanzo muhimu cha upatikanaji wa bidhaa hizo.
Mkurugenzi Mkuu wa CRDB Congo, Jessica Nyachiro ameeleza kuwa benki hiyo iko tayari kuwa kiunganishi muhimu kati ya wafanyabiashara wa Tanzania na soko la Congo, ikisisitiza kuwa ushirikiano huo utaongeza uaminifu na kurahisisha huduma za kifedha kwenye biashara za mipakani.
Katika ziara hiyo, Dk Nindi aliambatana pia na maofisa mbalimbali kutoka Wizara ya Kilimo na NFRA, ikiwa ni sehemu ya jitihada pana za Serikali kuhakikisha mazao ya Tanzania yanafika katika masoko mapya na kuendelea kuinua kipato cha wakulima.
Kupitia makubaliano hayo mapya, Tanzania inatarajiwa kuongeza mauzo ya mazao ya nafaka nje ya nchi, huku DRC ikinufaika na upatikanaji wa uhakika wa chakula, hatua inayotajwa kuwa ushindi wa kiuchumi kwa pande zote mbili.