Dar es Salaam. Mamlaka ya Hali ya Hewa Tanzania (TMA) imetoa tahadhari kuhusu kuongezeka kwa kiwango cha joto katika maeneo mbalimbali nchini, hususan mikoa inayopata misimu miwili ya mvua kwa mwaka.
Ongezeko hilo limeonekana kwa wiki za karibuni na limehusishwa moja kwa moja na kusogea kwa jua la utosi pamoja na upungufu wa mvua katika baadhi ya maeneo.
Kwa mujibu wa TMA, vipindi vya jua la utosi nchini hufikia kilele mwishoni mwa Novemba wakati jua likisogea kuelekea Kusini (Tropiki ya Kaprikoni), na hutokea tena Februari wakati jua likielekea Kaskazini (Tropiki ya Kansa).
Katika vipindi hivyo, uso wa Dunia katika maeneo husika huwa karibu zaidi na jua, hivyo kupelekea joto kupanda kuliko ilivyo kawaida.
Taarifa ya TMA zinaonyesha kuwa hadi kufikia Novemba 27, 2025, baadhi ya vituo vya hali ya hewa viliripoti ongezeko kubwa la joto ikilinganishwa na wastani wa muda mrefu wa Novemba:
- Moshi (Kilimanjaro): 35.7°C mnamo Novemba 21 ongezeko la 4.2°C juu ya wastani.
- Ilonga (Morogoro): 35.5°C mnamo Novemba 20 — ongezeko la 2.7°C.
- Morogoro Mjini: 34.5°C mnamo Novemba 26 — ongezeko la 2.3°C.
- Ibadakuli (Shinyanga): 33.6°C mnamo Novemba 14 — ongezeko la 2.2°C.
- Dar es Salaam: 33.2°C mnamo Novemba 19 na 21 — ongezeko la 1.6°C.
TMA imeeleza kuwa ongezeko la unyevu angani, linalochangiwa na mvuke kutoka Bahari ya Hindi, nalo limeongeza hisia ya joto katika maeneo ya pwani na mikoa ya jirani.
Hivyo, wakati viwango vya joto vinavyopimwa vinaonekana kuwa vya wastani, wananchi wengi huhisi joto zaidi kuliko kiwango halisi.
Hata hivyo mamlaka hiyo imeeleza kuwa, kuanza kwa vipindi vya mvua mwezi Desemba 2025 kunatarajiwa kupunguza joto katika maeneo mengi, hususan yanayopata misimu miwili ya mvua kwa mwaka. Mvua hizo zitasaidia kushusha joto na kuboresha hali ya hewa katika maeneo yaliyokumbwa na ongezeko kubwa la joto.
Mamlaka imetoa wito kwa wananchi kuendelea kufuatilia taarifa za utabiri na tahadhari za hali ya hewa zinazoendelea kutolewa, hasa zinazohusu hali mbaya ya hewa, itakayoambatana na vipindi vya mvua.
Aidha, TMA imesisitiza umuhimu wa kufuata ushauri wa wataalamu wa sekta mbalimbali kama afya, kilimo, na miundombinu, ili kupunguza athari zinazoweza kutokana na vipindi vya joto kali au mabadiliko ya ghafla ya hali ya hewa.