Dodoma. Tume ya Utumishi wa Umma imepanga kufanya mkutano wa pili katika mwaka wa fedha 2025/26 kwa ajili ya kupitia rufaa za watumishi waliofukuzwa kazini.
Mkutano huo umepangwa kufanyika kuanzia Desemba Mosi, 2025 hadi Desemba 19, 2025 kwenye ukumbi wa mikutano wa Mahakama Jumuishi ya Tanzania uliyopo eneo la Msamvu, Manispaa ya Morogoro.
Kaimu Katibu wa Tume ya Utumishi wa Umma, John Mbisso ametoa taarifa hiyo leo Ijumaa Novemba 28, 2025 alipozungumza na waandishi wa habari katika Ofisi za Tume zilizopo jengo la Chimwaga, Chuo Kikuu cha Dodoma.
Katika kipindi cha mwaka huu, mkutano huo ni wa pili baada ya ule wa awali uliofanyika Septemba 29, 2025 hadi Oktoba 17, 2025.
Katika kikao hicho, jumla ya watumishi 34 waliokuwa wamefukuzwa kazi walirejeshwa makazini wakati 38 waliendelea na adhabu walizopewa na rufaa 10 zilitupiliwa mbali katika jumla ya rufaa 108 zilikatwa kwa Tume.
Hata hivyo, leo, Kaimu Katibu hakutaja kikao kijacho Tume hiyo chini ya mwenyekiti wake Jaji mstaafu, Hamisa Kalombola, kitakuwa na rufaa ngapi ambazo zimewasilishwa mbele ya Tume.
“Katika mkutano huo, Tume itajadili na kutoa uamuzi wa rufaa na malalamiko yaliyowasilishwa na watumishi wa Umma, aidha Tume itatoa nafasi kwa warufani na warufaniwa kufika mbele yake kutoa ufafanuzi,” amesema Mbisso.
Amesema Tume itapitia taarifa mbalimbali za utekelezaji wa majukumu yake katika kipindi cha robo ya kwanza ya mwaka wa fedha 2025/26 ambao itafanya ziara kwenye baadhi ya Taasisi za Serikali zilizopo katika Manispaa ya Morogoro.
Kwa mujibu wa kiongozi huyo, Tume itatoa elimu kwa waajiri, mamlaka za ajira na mamlaka za nidhamu kuhusu uzingatiaji wa sheria, kanuni na taratibu.
Akijibu swali kuhusu idadi ya malalamiko na rufaa zinazofikishwa mbele ya Tume, amesema kwa sasa idadi imepungua ukilinganisha na miaka mitatu iliyopita.
Mwalimu Sostenes Lusinde amesema mbele ya Tume hiyo kuna uhuru mpana wa kusikilizwa na mara nyingi kama mtumishi alifukuzwa kwa kuonewa ukweli huthibitika na wengi wanafanikiwa.
Lusinde ametolea mfano wa ndugu yake aliyekuwa mmoja wa watu waliorejeshwa kazini mwaka huu kwamba alikuwa amefukuzwa bila kufuata sheria, tena ilikuwa kwa maonezi lakini amerejeshwa na sasa anadai mishahara yake kisha aombe kubadiri kada kwenye utumishi.