Dar es Salaam. Wiki hii Zuchu, staa wa Bongofleva kutokea WCB Wasafi ameweka rekodi nyingine kubwa kupitia muziki mara baada ya video zake kutazamwa (views) zaidi ya mara bilioni 1 katika mtandao wa YouTube.
Zuchu anakuwa mwanamuziki wa kwanza wa kike Afrika Mashariki kufanya hivyo ikiwa ni miaka mitano tu tangu alipotoka rasmi kimuziki kupitia Extended Playlist (EP) yake, I Am Zuchu (2020).
Kwa ujumla, Zuchu anakuwa mwimbaji wa nne kutokea kwenye Bongofleva kufikisha ‘views’ bilioni YouTube akiwa ametanguliwa na Diamond Platnumz, Rayvanny na Harmonize.
Hapa Afrika Mashariki wanamuziki wa kike wanaomfuatia Zuchu kwa kufanya vizuri YouTube ni Nandy (Tanzania) – views 306 Milioni, Diana Bahati (Kenya) – 294M, Martha Mwaipaja (Tanzania) – 194M.
Wengine ni Sheebah (Uganda) – 175M, Christina Shusho (Tanzania) – 168M, Rose Muhando (Tanzania) – 166M, Rema Nakamula (Uganda) – 146M, Phina (Tanzania) – 122M na Spice Diana (Uganda) – 118M.
YouTube ni mtandao wa kucheza video unaomilikiwa na kampuni ya Google. Ulianzishwa Februari 14, 2005, huko San Mateo, California, Marekani. Kwa miaka sasa umekuwa ukiwalipa wasanii kupitia maudhui yao.
Kwa Zuchu mafanikio hayo yanakuja takribani mwaka mmoja tangu alipoachia albamu yake ya kwanza, Peace and Money (2024) yenye nyimbo 13 na kuwashirikisha wasanii saba kutokea Bongo na kimataifa.
Nyimbo zake kama Sukari (2021), Kwikwi (2022), Honey (2023), Nyumba Ndogo (2021) na Cheche (2020), zimechangia kwa sehemu kubwa katika rekodi hiyo.
Mathalani, mnamo Desemba 2021, video ya wimbo wake ‘Sukari’ iliandika rekodi kama video ya muziki iliyotazamwa zaidi YouTube barani Afrika kwa mwaka huo ikitazamwa zaidi ya mara milioni 60.
Pia baadaye ilikuja kuweka rekodi kama video ya kwanza kutoka kwa msanii solo nchini Tanzania na Afrika Mashariki kutazamwa zaidi ya mara milioni 100 YouTube ikifanya hivyo hapo Machi 2024.
Kabla ya hapo, video za nyimbo zote zilizotazamwa zaidi ya mara milioni 100 YouTube ni zile ambazo walishirikiana wasanii kuanzisha wawili. Nazo ni Yope Remix (2019), Inama (2019) na Waah! (2020) zake Diamond, na Kwangwaru (2018) yake Harmonize.
Hivyo ni wazi ilionekana Zuchu atakuja kuwa na rekodi kama hii tunayoijadili sasa ila pongezi nyingi ziende kwa Diamond kwani wanamuziki wote waliofikisha ‘views’ zaidi ya bilioni 1 YouTube wametokea WCB Wasafi.
Ikumbukwe Diamond, mshindi wa MTV EMAs mara tatu, ndiye mwanamuziki wa kwanza Kusini mwa Jangwa la Sahara kutazamwa zaidi ya mara bilioni 1 YouTube, rekodi aliyoiweka hapo Juni 2020.
Pia aliendelea kuongozwa kwa kutazamwa ukanda hao hadi Agosti 2023, ambapo alishushwa hadi nafasi ya pili na staa kutokea Nigeria, Burna Boy ambaye ni mshindi wa Grammy 2021.
Kwa Tanzania na hata Afrika Mashariki kwa ujumla, baada ya Diamond kufikisha ‘views’ bilioni 1 YouTube, wasanii aliyowatoa chini ya lebo yake ya ndio waliyofuatia.
Rayvanny, mshindi wa BET 2017, alifanya hivyo mnamo Oktoba 2023, kisha Harmonize hapo Novemba 2023, ingawa hadi anaondoka WCB Wasafi mwishoni mwa 2019, alikuwa mbele ya Rayvanny ila akaja kupitwa.
Zuchu anapiga hatua hiyo akiwa ni mwanamuziki namba mbili kwa kuwa na wafuatiliaji (subscribers) wengi YouTube ukanda wa Sahara akiwa ametanguliwa na mshindi wa Grammy kutokea Afrika Kusini, Tyla.
Ikumbukwe mnamo Aprili 2020, ndipo Zuchu alitambulishwa rasmi na WCB WCB katika Bongofleva akiwa ni msanii wa saba na wa pili wa kike katika lebo hiyo baada ya Queen Darleen.
Kabla ya Zuchu, lebo hiyo ilishawasaini Harmonize, Rayvanny, Rich Mavoko, Queen Darleen, Lava Lava na Mbosso aliyeunda kundi la Yamoto Band akiwa na wenzake watatu, Enock Bella, Beka Flavour na Aslay.
EP iliyomtambulisha, I Am Zuchu (2020), ilikaa katika chati za YouTube Music Tanzania kwa wiki zaidi ya 100 na ndiye msanii pekee wa kike Bongo aliyefanya hivyo.
Ikiwa ni miaka mitano chini ya WCB Wasafi, Zuchu amefanya mengi katika muziki wake akitengeneza mashabiki wengi pamoja na fursa za kiuchumi zinazotokana na ukuaji wa chapa yake.
Ameshinda tuzo saba za muziki Tanzania (TMA), tuzo mbili za African Muzik Magazine Awards (AFRIMMA), huku akiwania MTV Europe Music Awards (EMAs), Soundcity MVP Awards, Trace Awards n.k.