Dar es Salaam. Bendi yangu kubwa ya kwanza ilikuwa Orchestra Mambo Bado iliyokuwa ikiongozwa na mwanamuziki mkongwe Tchimanga Kalala Assossa. Kabla ya hapo nikiwa na wenzangu tulikuwa na bendi yetu ndogo pale Iringa iliyoitwa Chikwalachikwala.
Wakati nikiwa katika bendi hiyo nikapata nafasi ya kushiriki katika filamu ya ‘Wimbo wa Muanzi’, filamu iliyotengenezwa na kampuni ya hapa hapa nchini, Tanzania Film Company (TFC), na kampuni ya One World iliyokuwa na makao yake makuu Uholanzi.
Filamu ya Wimbo wa Muanzi ilihusu mradi ulioitwa ‘Mianzi miti’, mradi uliokuwa ukifanya majaribio ya kusambaza maji vijijini kupitia mianzi. Baada ya kumaliza kutengeneza filamu hiyo ambayo nilishiriki kama kijana aliyeitwa Omari, kijana ambaye alikuwa akiona kuwa mradi huo hautafanikiwa, bendi yetu ikatunga muziki wa kuambatana na filamu hiyo, yaani soundtrack.
Baada ya kutunga muziki huo, wanamuziki wanne tulisafiri kuja Dar es Salaam kurekodi muziki huo. Wanamuziki hao tulikuwa ni Ali Lashku, Hashim Kasanga, William Maselenge na mimi. Hashimu na Williamu wamekwisha tangulia mbele ya haki.
Tulipofika studio za TFC, zilizokuwa Mikocheni Dar es Salaam kupata ratiba ya siku ya kuja kurekodi tukalikuta kundi la wanamuziki wakiwa chini ya Tshimanga Assossa wanarekodi wimbo wa tangazo la pedi za Tanpax, bidhaa iliyokuwa maarufu wakati huo kwa kinamama.
Tuliongea na wanamuziki hawa ili watusaidie kurekodi muziki tuliokuja nao. Tulifanya mazoezi na hatimaye kurekodi soundtrack hiyo. Baada ya kumaliza kurekodi ndipo Assossa akatuambia kuwa yuko mbioni kuanzisha bendi na kutupeleka mpaka ukumbi wa Lango la Chuma Mabibo na kutuonyesha vyombo vya muziki na ukumbi ambao ndiko mazoezi ya bendi hiyo yangeanza, na akatukaribisha kujiunga na kundi lake.
Ali Lashku na Hashim Kasanga wakaamua kurudi Iringa, wakati William Maselenge na mimi tukakubali kujiunga na kundi hilo. Na ndipo safari ya kuingia kwenye bendi kubwa ikaanzia hapo. Tulirudi Iringa kuaga na kisha kurudi Dar es Salaam na kuingia kambini na wanamuziki wengine mahiri tuliowakuta.
Kundi lilikuwa na wanamuziki wazuri sana wakiwamo Kazembe wa Kazembe, licha ya jina huyu alikuwa Msukuma mmoja aliyekuwa mahiri sana kwa gitaa la solo, pia likuweko mpiga gitaa marehemu Huruka Uvuruge, mpiga drums Sadi Mnala na William Maselenge akiwa kwenye gitaa la rythm.
Waimbaji wa Orchestra Mambo Bado walikuwa Tchimanga Assossa mwenyewe, mwanamke pekee muimbaji katika bendi Jenifa Ndesile, Athumani Cholilo, Lucas Faustin, George Mzee, Banza Tax na mimi John Kitime. Likisi Matola alipiga gitaa la bezi na kinanda, wakati Mzee Andre Milongo alikuwa akipiga bezi na second solo.
Yalikuwa maisha mapya kwani katika bendi ya Chikwalachikwala, kila mtu alikuwa na kazi yake na bendi ilikuwa ni sehemu ya kujifurahisha na kuendeleza kipaji bila mpangilio maalumu.
Huku kwenye bendi ya Mambo Bado, muziki ulikuwa kazi, tulianza mazoezi kila siku saa nne asubuhi, Jumatatu mpaka Ijumaa bila kukosa. Tulipumzika saa saba mchana kwa ajili ya chakula ambacho kilikuwa kikipikwa na mafundi mitambo, kisha mazoezi yaliendelea mpaka saa kumi au zaidi kutegemea na mori tuliokuwa nao siku hiyo.
Ni katika wakati huu wa mazoezi ndipo tulipotunga wimbo wa Bomoa Tutajenga Kesho, wimbo uliokuja kuwa nembo ya bendi, wimbo ambao ulitungwa kutokana na utani kuwa siku ya uzinduzi watu watajaa katika ukumbi na kubomoa geti. Wimbo huu ulikuja kupigwa marufuku na Umoja wa Vijana Mkoa wa Dar es Salaam.
Kwa wakati ule Orchestra Mambo Bado ilikuwa ni bendi ndogo kwani haikuwa na wanamuziki wengi kama ilivyokuwa kawaida kwa bendi nyingine. Kuonyesha hili kuna wakati Orchestra Maquis ilikuwa na wanamuziki 50, ukiachia mbali mafundi mitambo na wahudumu wengine!! Pia Orchestra Mambo Bado haikuwa na vyombo vya upulizaji yaani trampeti na saksafoni kama ilivyokuwa kawaida kwa bendi nyingi wakati ule, na pia hatukuwa na tumba.
Kukosekana kwa vyombo hivi ilikuwa ni kwa makusudi ili muziki wetu uwe tofauti na bendi nyingine. Staili iliyokuwa maarufu wakati huo ilikuwa ni rumba ambalo lilikuwa na mwendo wa taratibu, maarufu kwa jina la ‘super slow’.
Staili hiyo unaweza kuisikia katika wimbo wa Rufaa ya Kifo wa Dar International au Dora mtoto wa Dodoma uliopigwa na Orchestra Maquis. Orchestra Mambo Bado tulikuja na staili yetu ya mwendo kasi kufuatia mapigo ya mtindo wa Kavasha.
Hili ni wazi lilitokana na ubunifu wa Tchimanga Assossa ambaye aliwahi kupigia bendi maarufu za Kavasha miaka ya sabini za Orchestra Lipua Lipua, Orchestra Kamale na Orchestra Fuka Fuka.
Tulipata umaarufu sana hasa baada ya kutoa album ya kwanza iliyokuwa na nyimbo Bomoa Tutajenga Kesho na Kutokuelewana. Pia tulikuwa na wacheza show wazuri sana waliokuja na show iliyopewa jina la Bomoa, tulizunguka miji mingi nchini tukijaza kumbi. Lakini hatimaye nilibwaga manyanga katika bendi hii.
Nikiwa katika likizo hiyo ya kujiamulia nilifuatwa na binamu yangu Andy Swebe aliyekuwa akipiga bezi katika bendi ya Orchestra Makassy, yeye akaniita kwenye bendi hiyo. Huko nikakaribishwa Mzee Makassy, onyesho langu la kwanza lilikuwa siku ya Krismas mwaka 1984.
Kati ya wanamuziki niliowakuta huku walikuwa Mzee Fan fan Mose Sengo, Dr Remmy, Issa Nundu, Kyanga Songa, Kassim Mganga, Aimala Mbutu na wengine wengi ambao walikuwa mahiri sana, shule yangu ya muziki ikapata waalimu wapya, na kunifungulia vitabu vingi ambavyo vimenisaidia mpaka leo.
Wengi niliokuwa nao na niliowataja humu wameshatangulia mbele ya haki. Mungu awalaze pema rafiki zangu na walimu wangu hawa.