Diwani wa Kata ya Chanika Wilaya ya Handeni mjini Mkoani Tanga, Habibu Mbota ametoa wito kwa wazazi na walezi kuhakikisha wanashiriki kikamilifu katika kulea watoto katika misingi ya maadili mema.
Akizungumza katika mahafali ya Shule ya Little Star Day Care & Nursery School yaliyofanyika katika kata hiyo, Mbota amesema malezi bora ndiyo msingi wa kuwajenga vijana kuwa raia wema na wenye mchango chanya kwa jamii.
Katika hotuba yake, Mbota amesisitiza dhamira yake ya kufuta kabisa suala la watoto kufeli mtihani wa darasa la saba huku akisema hatua hiyo itawezekana endapo shule za awali ikiwemo Day Care na Nursery—zitaungwa mkono kikamilifu ili kuweka msingi imara wa elimu kabla ya wanafunzi kuingia shule ya msingi. Alibainisha kuwa hatua za awali za elimu ndizo zinazoamua uimara wa safari ya elimu ya mtoto kwa miaka ijayo.
Aidha, Mbota amewakumbusha wazazi na walezi kuhakikisha wanawasajili kwa wakati watoto wote waliofaulu kuendelea na masomo ya sekondari, pamoja na wale wenye umri wa kuandikishwa darasa la awali na chekechea.
Katika kuunga mkono juhudi hizo, Mbota amesema ofisi yake iko wazi kusaidia mzazi yeyote atakayekwama katika mchakato wa usajili au mwenye changamoto yoyote inayohusu elimu ya mtoto. Amewahakikishia wakazi wa Chanika kuwa atendelea kusimama bega kwa bega na shule zote za kata hiyo ili kuinua kiwango cha elimu.
(Feed generated with FetchRSS)