Wanasoka wanawake watano Afrika wanaolipwa fedha nyingi zaidi 2025

Wanasoka wanawake barani Afrika kwa sasa ni miongoni mwa wanamichezo wanaouzwa vizuri na kulipwa vyema zaidi duniani, wakinufaika na ukuaji wa ligi za kulipwa nchini China, Marekani, Ulaya na sasa Saudi Arabia.

Mchezo ambao hapo awali haukuthaminiwa wala kufadhiliwa vya kutosha, sasa umekuwa sekta yenye faida kubwa. Nyota kama Asisat Oshoala, Tabitha Chawinga, Barbra Banda, na Racheal Kundananji wamebadilisha taswira ya kandanda ya wanawake katika ligi mbalimbali duniani.

Wachezaji hawa wanaandika historia kwa kuvunja rekodi za mishahara, kupata udhamini mkubwa, na kuthibitisha kuwa vipaji vya Kiafrika vinashindana na bora zaidi duniani. Wamechangia pia kuongeza umaarufu wa Kombe la Mataifa ya Afrika la Wanawake (WAFCON) na Kombe la Dunia la Wanawake (FIFA Women’s World Cup).

Makala haya kwa usaidizi wa vyanzo mbalimbali ikiwemo sportblot inachambua wachezaji 5 wanaolipwa zaidi barani Afrika, yakionyesha mafanikio yao katika klabu na timu ya taifa, pamoja na taarifa zao za utajiri. Mapato yao yanajumuisha mishahara , mafao, udhamini na motisha nyingine.

Tofauti na soka la wanaume ambako wachezaji hupata mishahara ya mamilioni kwa mwaka, wachezaji wanawake wengi kwa mwaka mwaka 2025 hupata kati ya $100,000 hadi $600,000 kwa wachezaji wa ngazi ya juu kabisa.

Mshambuliaji wa Malawi, Tabitha Chawinga, alizaliwa mwaka 1996 na ni nahodha wa timu ya taifa. Alitoka kwenye maisha ya kawaida na amewahi kucheza Sweden, China, na Inter Milan kabla ya kusaini mkataba wa miaka mitatu na Olympique Lyonnais mnamo Julai 2024. Mwaka 2025, ndiye kinara wa safu ya ushambuliaji ya Lyon katika D1 Féminine.

Chawinga ni miongoni mwa wachezaji wanaolipwa vizuri zaidi na anapata takriban $450,000 kwa mwaka. Ana utajiri unaokadiriwa kufikia $1 milioni.

Ameshinda tuzo ya mchezaji bora wa fainali ya Coupe de France 2024, na pia tuzo ya SADC Women’s Player of the Year. Ndiyo Mmalawi wa kwanza kucheza UEFA Women’s Champions League (ligi ya mabingwa Ulaya kwa wanawake) na Muafrika wa kwanza kushinda kiatu cha dhahabu cha ligi kuu Italia kwa wanawake mnamo 2023.

Asisat Oshoala, mzaliwa wa 1994, ni mchezaji nyota wa Nigeria na mshindi wa mara sita wa tuzo ya mchezaji bora wa Afrika kwa wanawake (African Women’s Footballer of the Year). Baada ya kucheza Rivers Angels na Barcelona ambapo alishinda mataji mawili ya Klabu bingwa Ulaya (UEFA Women’s Champions League) na mataji matano ya Liga F , alijiunga na Bay FC mwaka 2024 kisha akahamia Al Hilal kwa mkataba wa miaka miwili mnamo Septemba 2025.

Uwekezaji wa ligi hiyo katika vipaji umefanya Oshoala kupata takriban $500,000 kwa mwaka. Kupitia udhamini wa Pepsi na Puma, utajiri wake umefikia $3.2 milioni.

Ameweka historia kwenye kombe la dunia na Ligi ya mabingwa Ulaya, akifunga zaidi ya magoli 100 barani Ulaya. Aliwahi kushinda kiatu cha dhahabu cha ligi kuu ya wanawake China 2017 na kuwa mfungaji bora wa Primera división 2021/22.

Racheal Kundananji, mzaliwa wa 2000, ni mshambuliaji wa Zambia. Mnamo 2024, aliingia katika historia kwa kusajiliwa na Bay FC kwa dau lililovunja rekodi ya dunia, $860,000, na hivyo kuwa mmoja wa wachezaji ghali zaidi katika historia ya soka la wanawake.

Kwa mkataba wa miaka minne, Kundananji analipwa takriban $500,000 kwa mwaka. Ana utajiri unaokadiriwa kufikia $2 milioni, ukiongezwa na bonasi.

Amecheza Kazakhstan, Hispania, na sasa Marekani (NWSL). Uwezo wake umeonekana zaidi kwenye michezo ya Olimpiki 2024, ambako aliisaidia Zambia kufuzu na kufanya vizuri.

Barbra Banda, mzaliwa wa 2000, ni mshambuliaji hatari na nahodha wa Zambia. Mnamo 2024, alihamia Orlando Pride kwa dau la karibu $740,000, moja ya ada kubwa zaidi katika soka la wanawake. Yuko kwenye mkataba wa miaka minne na ni mchezaji wa pili ghali zaidi duniani kwa mapato.

Banda hupata takriban $525,000 kwa mwaka, akiiweka miongoni mwa wachezaji wanaolipwa zaidi duniani. Utajiri wake unakadiriwa kufikia $1.5 milioni.

Amejulikana kwa uwezo wa ajabu wa ufungaji akiwahi kufunga hat-trick kwenye Olimpiki na kombe la dunia. Mnamo 2024, alishinda ubingwa wa NWSL, aliingia kwenye NWSL Best XI, na alikuwa miongoni mwa waliowania tuzo ya Ballon d’Or Féminin. Kwenye ngazi ya kimataifa, ndiye mfungaji bora wa kihistoria katika michezo ya Olimpiki.

Thembi Kgatlana, mzaliwa wa 1996, alihamia Tigres mwaka 2023 kwa ada ya $275,000, iliyokuwa ya pili kwa ukubwa katika NWSL wakati huo. Alisaini mkataba wa miaka mitatu na ameendelea kung’ara katika Liga MX Femenil.

Kgatlana ndiye mwanasoka wa kike wa Kiafrika anayelipwa zaidi takriban $550,000 kwa mwaka. Tuzo na udhamini vimefanya utajiri wake kufikia $2.5 milioni.

Ameshinda tuzo ya mchezaji bora Afrika 2018, na ni miongoni mwa wachezaji walioiongoza Banyana Banyana kufuzu hatua ya mtoano ya kombe la dunia na kushinda WAFCON. Mnamo 2019, alifunga bao la kwanza la Afrika Kusini katika historia ya kombe la dunia.

Uwezo wake wa kasi na ufungaji umemfanya kuwa miongoni mwa nyota wanaoheshimika zaidi ulimwenguni.