Chanzo cha picha, Polepole Instagram
Aliyekuwa Balozi wa Tanzania nchini Cuba, na mkosoaji wa serikali ya Tanzania Humphrey Polepole, amevamiwa na kuchukuliwa na watu wasiojulikana, familia yake imethibitisha.
Ndugu wa Polepole wameambia BBC kuwa tukio hilo la kuvamiwa na kutekwa kwa ndugu yao kumetokea usiku wa kuamkia leo Jumatatu Oktoba sita nyumbani kwake jijini Dar Es Salaam.
Picha za video zimekuwa zikisambaa katika mitandao ya kijamii nchini Tanzania zikionesha milango imevunjwa na michirizi ya damu katika sakafuni katika nyumba inayoripotiwa kuwa alikuwa akiishi Polepole.
Familia kupitia Godfrey Polepole ambaye ni mdogo wake Humphrey Polepole ameiambia BBC kwamba taarifa hizo ni za kweli na tayari wameripoti katika kituo cha polisi Mbweni.
”Taarifa hizi ni za kweli,tumefika nyumbani alikokuwa anakaa tumekuta mlango umevunjwa nyanya za umeme zimekatwa, Damu nyingi sana zimemwagika, tumekuja kutoa taarifa kituo cha polisi Mbweni’alisema Godfrey
Polisi wanafuatilia
BBC imezungumza na kamanda wa polisi kanda maalum ya Dar es salaam Jumanne Muliro amesema jeshi linafuatilia taarifa hizo.
”Mara kadhaa amekuwa akisema yupo wapi? kama umekuwa ukimfwatilia anekuwa akisema yupo nje ya nchi sasa anawezaje kufanyiwa hicho unachokisema nyumbani kwake,kuna vitu vingine lazima tufikiri wote kwa Pamoja wewe na mimi tuulizane. Kwakifupi sana taarifa hiyo kama unavyoifwatilia wewe na mimi naifwatilia kutaka kujua ni nini, kinaendelea.”
Polisi pia kupitia msemaji wake kuwa imeona taarifa hizo mtandaoni na inaendelea kuzifuatilia na kusema kuwa wao bado wanamsubiri Polepole kuitika wito wa kwenda kutoa maelezo juu ya tuhuma mbalimbali ambazo amekuwa akizotoa kupitia mitandao ya kijami toka alipojiuzulu.
Humphrey Pole Pole alijiuzulu nafasi ya ubalozi na kuvuliwa rasmi hadhi ya ubalozi kufuatia kutenguliwa kwa uteuzi wake na Rais Samia Suluhu Hassan.
Uamuzi wake ulifuatia kile alichoeleza kutoridhishwa na mwenendo wa mambo mbalimbali nchini Tanzania akidai hawezi kuwa sehemu ya serikali isiyojali misingi ya haki, sheria na katiba ya nchi.