Chanzo cha picha, EPA
Mazungumzo yasiyo ya moja kwa moja yanayolenga kufikia makubaliano ya mwisho kuhusu mpango wa amani wa Marekani wa kumaliza vita huko Gaza yanapangwa kuendelea siku ya Jumanne katika mji wa Sharm El-Sheikh nchini Misri.
Maafisa wa Palestina na Misri wameiambia BBC kwamba vikao hivyo vinalenga “kuunda mazingira” ya uwezekano wa mabadilishano ambayo yatawezesha kuachiliwa kwa mateka wote wa Israeli kama malipo ya wafungwa kadhaa wa Kipalestina.
Waziri Mkuu wa Israel alisema Jumamosi kwamba anatumai kutangaza kuachiliwa kwa mateka “katika siku zijazo”.
Maafisa hao walipokutana Jumatatu, Rais wa Marekani Donald Trump aliwaambia waandishi wa habari katika Ikulu ya White House: “Tuna nafasi nzuri sana ya kufanya makubaliano, na yatakuwa makubaliano ya kudumu.”
Wapalestina wengi walielezea jibu la Hamas kwa mpango huo wa amani kuwa halikutarajiwa, baada ya siku kadhaa za dalili kwamba kundi hilo lilikuwa linajiandaa kukataa au angalau kusisitiza kwa kiasi kikubwa kukubali pendekezo la mpango wa amani wa Trump.
Badala yake, Hamas ilijizuia kujumuisha “mistari nyekundu” ya jadi katika taarifa rasmi, hatua ambayo wengi wanaitafsiri kama ishara ya shinikizo kutoka nje.
Viongozi wa Ulaya na Mashariki ya Kati wamekaribisha pendekezo hilo. Mamlaka ya Palestina (PA), ambayo inasimamia baadhi ya maeneo ya Ukingo wa Magharibi unaokaliwa na Israel, imezitaja juhudi za rais wa Marekani kuwa “za dhati “.
Unaweza kusoma;