Je, ni nani atanyakuwa nafasi zilizosalia kufuzu Kombe la Dunia 2026?

Nafasi saba bado hazijajulikana katika kufuzu kwa Kombe la Dunia la FIFA 2026, huku hatua ya makundi ya kufuzu barani Afrika ikikaribia tamati.

Mechi zitachezwa kati ya Jumatano tarehe 8 hadi Jumanne tarehe 14 Oktoba, ambapo ni washindi wa makundi tisa pekee watakaofuzu moja kwa moja kwa fainali hizo zitakazoshirikisha timu 48 kwa mara ya kwanza.

Tayari Morocco (waliotinga nusu fainali Qatar 2022) na Tunisia wamejihakikishia nafasi.

Cape Verde wako ushindi mmoja tu kuandika historia kwa kufuzu kwa mara ya kwanza kabisa kwenye Kombe la Dunia, huku Misri na Algeria pia wakijua kuwa pointi tatu tu kutoka mechi zao mbili zijazo zitawatosha kuwa vinara wa makundi yao.

Timu nne bora zilizomaliza nafasi ya pili katika makundi yote tisa zitaingia hatua ya mchujo mwezi ujao, ambapo mshindi atapata nafasi nyingine kupitia mchujo wa bara mbalimbali (intercontinental play-offs).

Kwa mataifa makubwa kama Cameroon na Nigeria kuwa hatarini kukosa fainali hizi, BBC Sport Africa inachambua nafasi za kila kundi.

Misri ina faida ya pointi tano dhidi ya Burkina Faso, na inatarajiwa kufuzu rasmi iwapo itashinda ugenini dhidi ya Djibouti Jumatano saa 16:00 GMT.

Djibouti iko mkiani na imeshinda pointi moja tu kutoka mechi nane. Misri wakipoteza kwa mshangao, watakuwa na fursa ya pili nyumbani dhidi ya Guinea-Bissau Jumapili.

Burkina Faso, wanaopewa nafasi kubwa ya kumaliza wa pili, watacheza na Sierra Leone kisha wawaalike Ethiopia. Hata hivyo, huenda wakahitaji pointi zote ili kufuzu mchujo wa pili.

Sierra Leone na Guinea-Bissau pia zina matumaini madogo ya kunyakua nafasi ya pili.

Wanaowania uongozi wa kundi: Misri, Burkina Faso

Senegal ilipindua matokeo kutoka 2-0 hadi kushinda dhidi ya DR Congo mwezi uliopita, na sasa wanaongoza kwa pointi moja.

Simba wa Teranga watasafiri kwenda kukutana na Sudan Kusini (mkiani) Ijumaa, kisha wawaalike Mauritania.

Ushindi mechi zote mbili utawapeleka Kombe la Dunia kwa mara ya tatu mfululizo.

DR Congo wanahitaji Senegal wajikosee, huku wao wakishinda dhidi ya Togo na Sudan.

Sudan lazima ishinde mechi zote na Senegal ipoteze zote ili wafuzu moja kwa moja.

Wanaowania uongozi wa kundi: Senegal, DR Congo, Sudan

FIFA ilipoamua kuwa Afrika Kusini ilimtumia Teboho Mokoena ambaye hakufaa kucheza dhidi ya Lesotho, ushindi wa 2-0 ukageuzwa kuwa 3-0 kwa Lesotho.

Benin sasa wanaongoza kundi kwa tofauti ya mabao tu dhidi ya Afrika Kusini. Nigeria na Rwanda wako pointi tatu nyuma lakini bado wana matumaini.

Benin watasafiri Rwanda kisha Nigeria, huku Bafana Bafana wakienda Zimbabwe kisha kuwakaribisha Rwanda.

Washindi wa mara tatu Nigeria lazima washinde mechi zote mbili, lakini hata hivyo huenda isitoshe kufuzu mchujo.

Wanaowania uongozi wa kundi: Benin, Afrika Kusini, Nigeria, Rwanda, Lesotho

Ushindi wa kushangaza wa 1-0 dhidi ya Cameroon mwezi uliopita uliiweka Cape Verde kileleni kwa pointi nne zaidi.

Blue Sharks wanahitaji ushindi mmoja tu kati ya mechi dhidi ya Libya Jumatano (saa 13:00 GMT) au Eswatini nyumbani Jumatatu ijayo kufuzu kwa mara ya kwanza katika historia yao.

Cameroon wanaweza kufuzu kwa tofauti ya mabao iwapo wataishinda Mauritius na Angola, huku Cape Verde wakitoa sare mechi zote mbili au kupoteza.

Libya pia wapo pointi moja tu nyuma ya Cameroon na wanaweza kuongoza kundi iwapo matokeo yatawaendea vyema.

Wanaowania uongozi wa kundi: Cape Verde, Cameroon, Libya

Morocco ilifuzu kwa michezo miwili kusalia na kuibuka na ushindi dhidi ya Congo-Brazzaville ingeshuhudia Atlas Lions wakimaliza kampeni wakiwa na rekodi ya 100%.

Tanzania, Niger na Zambia zimetenganishwa kwa pointi nne na kumenyana kuwania nafasi ya pili, lakini kufikia hatua ya mtoano inaweza kuwa vigumu.

Washindi wa Kundi: Morocco (waliofuzu)

Ivory Coast wanaongoza kwa tofauti ya pointi moja dhidi ya Gabon baada ya kutoka sare ya 0-0 mjini Franceville mwezi Septemba.

Tembo hao watasafiri hadi Ushelisheli siku ya Ijumaa (13:00 GMT) na kisha kutumbuiza Kenya Jumanne ijayo.

Gabon wanakabiliwa na mchezo wa ugenini dhidi ya Gambia na kisha kuwakaribisha Burundi.

Iwapo watashinda michezo yote hiyo miwili na kushindwa na mabingwa hao watetezi wa ligi kuu ya bara basi Panthers wataonekana kujihakikishia nafasi ya kufuzu.

Washindi wa kundi wanaowezekana: Ivory Coast, Gabon

Algeria, timu nyingine iliyo na faida ya pointi nne, inajua ushindi mmoja kutokana na mechi dhidi ya Somalia ambayo tayari imetolewa na Uganda iliyo nafasi ya pili itajihakikishia nafasi ya kwanza.

Uganda wako mbele tu ya Msumbiji kwa tofauti ya mabao katika pambano la kuwania nafasi ya pili.

The Cranes watasafiri hadi Botswana katika mchezo wao wa kwanza Alhamisi kabla ya ziara yao ya Kaskazini mwa Afrika, huku Msumbiji wakiikaribisha Guinea kabla ya mchezo wao wa ugenini dhidi ya Somalia.

Washindi wa kundi wanaowezekana: Algeria, Uganda, Msumbiji

Tunisia ilimaliza kileleni ikiwa imesalia michezo miwili, na Namibia wanaonekana kuwa na uwezekano wa kupata nafasi ya pili.

Brave Warriors wako pointi nne mbele ya Liberia na tano mbele ya Malawi na Equatorial Guinea.

Namibia itaenda Liberia siku ya Alhamisi kabla ya kumaliza na safari ya kwenda Tunis. Lone Stars itatembelea Equatoguineans katika raundi ya mwisho Jumatatu ijayo.

Washindi wa Kundi: Tunisia (waliofuzu)

Pande tatu zinapigania nafasi ya kufuzu moja kwa moja, huku Ghana wakiwa mbele kwa pointi tatu dhidi ya Madagascar, na Comoro wakiwa nyuma ya wenzao wa visiwa hivyo.

Wenyeji wa Afrika Magharibi watasafiri hadi Jamhuri ya Afrika ya Kati siku ya Jumatano (16:00 GMT), na Comoro watawatumbuiza Wamalagasi siku hiyo hiyo.

Ghana itafuzu iwapo itashinda na Madagascar itashindwa kutwaa pointi tatu.

Black Stars wanamaliza kampeni yao kwa mechi ambayo inaweza kuwa muhimu nyumbani dhidi ya Comoro Jumapili huku Madagascar ikienda kwa Mali katika mechi za raundi ya mwisho.

Washindi wa kikundi wanaowezekana: Ghana, Madagascar, Comoros

Timu nne bora za pili zitashiriki mchujo wa Afrika mwezi Novemba.

Kwa sasa, Gabon, Madagascar, DR Congo na Burkina Faso wana rekodi bora zaidi baada ya mechi nane.

Lakini ili kulinda uadilifu wa michezo baada ya Eritrea kujiondoa kutoka Kundi E, mechi dhidi ya timu ya sita kwenye kila kundi huenda zikaondolewa kwenye hesabu rasmi.

Hili litabadilisha msimamo ambapo Cameroon na Afrika Kusini wanaweza kunufaika, huku Madagascar na Burkina Faso wakishushwa.

Hata hivyo, FIFA wala CAF hawajatoa tamko rasmi kuhusu hilo.

Mengi yanaweza kubadilika kwenye raundi mbili za mwisho za kufuzu hasa ikizingatiwa kuwa nafasi ya mwisho kwenye makundi sita bado haijajulikana, jambo linaloweza kubadilisha orodha ya waliomaliza wa pili.

Mfumo wa mchujo wa mwisho pia haujatangazwa, lakini mshindi wa jumla atafuzu kwa hatua ya kimataifa mwezi Machi mwaka ujao.

Imetafsiriwa na Mariam Mjahid