Chama kikuu cha upinzani nchini Tanzania, Chadema, siku ya Jumapili kimefutilia mbali ushindi mkubwa wa Rais Samia Suluhu Hassan katika uchaguzi uliosababisha maandamano makubwa kote nchini kutokana na kutengwa kwa wapinzani wake wakuu katika uchaguzi.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Chama cha rais Chama Cha Mapinduzi (CCM) kilishinda kwa 98% ya kura katika uchaguzi wa Jumatano, kulingana na tume ya uchaguzi, INEC.
Chama kikuu cha upinzani cha Chadema, ambachoo kilizuiliwa kushiriki uchaguzi kwa kukataa kusaini kanuni za maadili na ambapo kiongozi wake, Tundu Lissu, alikamatwa kwa uhaini mwezi Aprili, kimesema matokeo hayo yalighushiwa.
Chama hicho kimeongeza kwenye mitandao ya kijamii: “Chadema inafutilia mbali vikali kile kinachoitwa matokeo ya uchaguzi yaliyotangazwa na Tume ya Taifa ya Uchaguzi. Matokeo haya hayana msingi wowote, kwani ukweli ni kwamba hakuna uchaguzi wa kweli uliofanyika Tanzania.”
“Maandamano ya kitaifa yanaonyesha wazi kwamba raia hawakushiriki katika kile kinachoitwa uchaguzi na kwamba wanamkataa mtu yeyote aliyetoka katika mchakato huu wa uchaguzi wenye dosari,” taarifa hiyo imeongeza.
Samia Suluhu Hassan, aliyeingia madarakani mwaka wa 2021, alihudhuria sherehe katika mji mkuu wa utawala, Dodoma, siku ya Jumamosi kupokea cheti chake cha ushindi kutoka kwa mamlaka ya uchaguzi.
Mwanamke huyo mwenye umri wa miaka 65 aliwapongeza Watanzania kwa kumpigia kura nyingi mwanamke kuongoza nchi na akaongeza: “Sasa kwa kuwa uchaguzi umekwisha, ni wakati wa kuunganisha nchi yetu na kutoharibu kile ambacho tumekijenga kwa zaidi ya miongo sita.”
“Tutachukua hatua zote muhimu na kuhusisha vikosi vyote vya usalama ili kuhakikisha amani nchini.”
Chadema inadai kwamba mamia ya watu wameuawa na vikosi vya usalama tangu maandamano yalipoanza siku ya uchaguzi.
Licha ya uwepo mkubwa wa polisi, siku ya uchaguzi ilijaa machafuko, huku umati wa watu ukiingia mitaani kote nchini, ukirarua mabango ya Bi. Hassan na kushambulia polisi na vituo vya kupigia kura, na kusababisha kukatika kwa mtandao na kutangazwa sheria ya kutotoka nje.
Msemaji wa Chadema aliliambia shirika la habari la Ufaransa AFP siku ya Ijumaa kwamba takriban watu 700 waliuawa, kulingana na takwimu zilizokusanywa kutoka kwa mtandao wa ufuatiliaji wa hospitali na kliniki.