Chanzo cha picha, Getty Images
Rais wa Tanzania, Samia Suluhu Hassan, ametangaza msamaha kwa vijana waliokamatwa kufuatia maandamano ya siku tatu yaliyofanyika kuanzia siku ya uchaguzi, Oktoba 29, 2025.
Akizungumza leo bungeni wakati wa kulifungua Bunge la 13 la Jamhuri ya Muungano wa Tanzania, kwa mujibu wa Ibara ya 91(1) ya Katiba, Rais Samia alisema kuwa vijana hao wengine walifuata mkumbo hivyo waachiwe kwa utaratibu na kurejeshwa kwa familia zao.
”Vijana wengi waliokamatwa na kushtakiwa kwa makosa ya uhaini hawakujua wanachokifanya, nikiwa mama na mlezi wa taifa hili navielekeza vyombo vya kisheria na hasa ofisi ya Mkurugenzi wa mashtaka kuangalia kiwango cha makosa waliyofanya, na kwa wale ambao hawakudhamiria kufanya uhalifu, wafutiwe makosa yao,” alisema Rais Samia.
Maandamano hayo yaliripotiwa kusababisha vifo vya watu kadhaa, wengine kujeruhiwa, na uharibifu wa mali za umma na binafsi. Zaidi ya vijana 600 wwalikamatwa na kufunguliwa makosa yakiwemo ya uhaini.
“Sisi wazazi wenu, kama tungechukua hatua kama mlizochukua ninyi, leo hii Tanzania isingekuwa na neema na maendeleo mnayoyaona. Ni lazima tuwatendee haki vijana hawa,” alisema.
Rais Samia pia alitangaza kuwa serikali imeunda tume maalumu kuchunguza matukio yaliyotokea wakati wa maandamano hayo.
“Serikali imechukua hatua ya kuunda tume itakayochunguza kwa undani kilichotokea ili tujue kiini cha tatizo. Taarifa ya tume hiyo itatuongoza katika mazungumzo ya kuleta maridhiano na kudumisha amani,” alisema.
Akiendelea, Rais Samia alisema kuwa amehuzunishwa sana na tukio hilo na akatoa pole kwa familia zilizopoteza wapendwa wao, huku akiwatakia majeruhi kupona haraka.
Katika hotuba hiyo, aliwaomba wabunge na wageni waalikwa kusimama kwa dakika moja kuwaombea waliofariki katika ghasia hizo.
Rais aliwataka vijana wa Tanzania kukumbuka kuwa taifa hili limejengwa juu ya misingi ya umoja, amani na maelewano, na akasisitiza umuhimu wa kizazi kipya kulinda misingi hiyo.
Katika maandamano hayo yaliyodumu kwa siku tatu kuanzia Oktoba 29, 2025 siku ya uchaguzi, watu kadhaa wamepoteza maisha, wakitaka mabadiliko mbalimbali ikiwemo mifumo ya uchaguzi na usimamizi wa haki.
Awali Waziri wa Mambo ya Nje, Balozi Thabit Kombo, aliiambia BBC kuwa serikali haiwezi kuthibitisha idadi hiyo rasmi. Wengine wanasemekana kukamatwa au hawajulikani walipo, huku mashuhuda walioko Dar es Salaam wakieleza kusikia milio ya risasi katika siku mbili za mwanzo za maandamano. Juhudi za kumtafuta Msemaji wa Serikali zinaendelea.