Kwa nini Trump sasa anataka faili za Esptein ziwekwe hadharani?

Rais wa Marekani Donald Trump amewataka Warepublican katika Bunge la Congress kupiga kura kukubali kuwekwa hadharani mafaili yanayohusiana na Jeffrey Epstein – haya ni mabadiliko ya ghafla katika msimamo wake wa hapo awali wa kupinga juhudi za kuyaweka hadharani mafaili hayo.

Hayati Jeffrey Epstein alikuwa tajiri wa Marekani aliyepatikana na hatia ya uhalifu wa ngono dhidi ya watoto. Alikutwa amekufa kwenye chumba cha gereza 2019 akisubiri kesi nyingine kuhusu biashara ya ngono.

Alikuwa na ukaribu na watu mashuhuri, wakiwemo wanasiasa, wasomi, na wafanyabiashara, na alitumia utajiri na ushawishi wake kuwanyanyasa kingono na kuwasafirisha wasichana wengi wa umri mdogo kwa msaada wa mshirika wake wa muda mrefu, Ghislaine Maxwell.

Trump amekuwa akikabiliwa na uwezekano wa uasi baada ya idadi kubwa ya Wabunge wa Republican kuashiria kuwa watapiga kura kuunga mkono kuachiliwa faili hizo licha ya upinzani wa hapo awali wa rais huyo.

Ingawa hatua hiyo huenda ikapitishwa katika Baraza la Wawakilishi, bado hakuna uhakika ikiwa itapita katika Seneti inayodhibitiwa na Republican.

Na hata kama itapitishwa katika Seneti, bado haijulikani ni lini faili hizo zinaweza kutolewa na kama kutolewa huko kutawaridhisha wanaotaka ziwekwe hadharani.

Siku ya leo Jumanne, Baraza la Wawakilishi linatarajiwa kupiga kura ambayo itailazimisha Ofisi ya Mwanasheria MKuu wa serikali kutoa hadharani faili zote zinazohusiana na kesi ya Epstein ndani ya siku 30.

Waathiriwa kadhaa wa Epstein pia wanatarajiwa kuwepo huko Capitol Hill siku ya leo, ili kuunga mkono kupitishwa kwa muswada huo na pia watafanya mikutano na waandishi wa habari.

Kutolewa kwa faili hizo, kunaweza pia kujumuisha faili zinazohusu taarifa za mshirika wa Epstein, Ghislaine Maxwell, pamoja na maafisa wa serikali – waliotajwa katika kesi hiyo.

Kura hiyo itakuja siku mbili tu baada ya Trump kuandika kwenye Mtandao wa kijamii wa Truth Social, kuwahimiza Warepublican kupiga kura kwa ajili ya kuachiwa kwa faili hizo. Katika chapisho hilo, amesema “hatuna cha kuficha.”

Hata kabla ya kauli hiyo ya Trump, baadhi ya Warepublican katika Bunge waliweka wazi kuwa wako tayari kupingana na rais na Spika wa Bunge Mike Johnson ili kupiga kura ya ndio.

Iwapo itapita, bado inakabiliwa na mustakabali usio na uhakika katika Seneti, ambayo haina wajibu hata wa kupiga kura hiyo.

Bado haijulikani kama Kiongozi wa Wengi katika Seneti John Thune ataruhusu kura hiyo – lakini Republican iko chini ya shinikizo kubwa kutoka pande zote mbili za kisiasa nchini Marekani.

Hapo awali alisema “hajaona” hamu kubwa kutoka kwa Warepublican wenzake kushinikiza kutolewa kwa hati hizo. Lakini wataalamu wanasema kura ya Bunge inaweza kubadilisha hilo.

“Natumai John Thune atafanya jambo sahihi,” Mwakilishi wa Republican wa Kentucky Thomas Massie aliambia ABC News mwishoni mwa wiki.

Mrepublican mwingine, katika Seneti John Barrasso, aliiambia “Meet the Press” ya NBC kwamba Seneti “itaangalia” mswada huo ikiwa utapitishwa na Bunge.

Baada tu ya Seneti kupitisha mswada huo ndipo utaelekea kwa Rais Trump, ambaye amesema atautia saini kuwa sheria.

Hata hivyo, kuna vikwazo kwa faili hizo hata kama zitaidhinishwa kutolewa.

Kwa mfano, hatia zitakazokwenda katika Bunge, Mwanasheria Mkuu wa Serikali anaweza kuficha au kurekebisha sehemu za rekodi ambazo zina taarifa za binafsi ambazo “zinaweza kufichua faragha za watu bila sababu za maana.”

“Kufichua kila kitu kunaweza kufichua habari nyingi binafsi ambazo hazifai au hazifai kwa matumizi ya umma,” Jonathan Entin, profesa wa sheria na katiba katika Chuo Kikuu cha Case Western Reserve huko Ohio, aliiambia BBC.

“Pia kunaweza kuwepo na masuala fulani kuhusu mbinu za kusimamia sheria ambazo ofisi ya mwanasheria inaweza kuzuia zisitoke kwa umma,” ameongeza.

Ofisi ya mwanasheria wa serikali pia inaweza kushikilia hati zozote ambazo “zinahatarisha uchunguzi wa serikali au mashtaka yanayoendelea, mradi tu zuio kama hilo ni la kisheria na kwa muda mfupi.”

Hilo linaweza kusababisha ucheleweshaji, ikizingatiwa kwamba Rais Trump alisema katika maoni yake kwamba anataka uchunguzi ufanyike kuhusu uhusiano unaodaiwa kuwepo kati ya Epstein na wanachama mashuhuri wa Democratics, kama vile Bill Clinton na Larry Summers” ili kubaini kinachoendelea.”

Prof Entin anasema. “Ikiwa kutakuwa na uchunguzi kama huo, waendesha mashitaka hawatataka kila kitu kiwekwe wazi, wakati wanafanya tathmini ikiwa wafungue mashitaka au la.”

Kwa wale ambao wamefanya kampeni ya kuachiliwa kwa faili hizo, chochote kisichoweza kufichuliwa kikamilifu kinaweza kuzusha maswali zaidi na hata hasira.

“Naamini nchi inastahili uwazi katika faili hizi,” Marjorie Taylor Greene, Mbunge wa Republican huko Georgia ambaye sasa yuko katika mabishano ya hadharani na Trump kuhusu faili hizo, aliiambia CNN Jumapili.