Rais Donald Trump amesema pia kwamba anaridhia mkakati wa Marekani wa kuyashambulia magenge ya walanguzi wa madawa ya kulevya ndani ya Mexico. Utawala wa Trump kwa sasa unaonekana kuongeza idadi kubwa ya vikosi vyake ktk eneo hilo la Karibi ili kuwakabili walanguzi hao wa madawa ya kulevya ambao wanapatikana katika eneo hilo hususan katika nchi mbalimbali za kanda ya latin Amerika zikiwemo Venezuela na Mexico.
“Kwa muda fulani nitazungumza naye” Trump aliwaambia waandishi wa habari mjini Washington alipoulizwa ikiwa atazungumza na Maduro. Hata hivyo Trump amesisitiza kwamba Rais Nicolas Maduro amekuwa si mtu mzuri kwa Marekani bila, hata hivyo, kutaja ni kwa namna gani.
Alipoulizwa ikiwa ataridhia kikosi cha Marekani kuingia nchini Venezuel Trump alijibu na hapa namnukuu: “Hapana siwezi kuamua hilo’ siwezi kuamua lolote.” Mwisho wa kumnukuu.
Trump alisema kwamba wanaendelea kuitazama Venezueal kwa jicho la karibu kwa sababu kwa kauli yake nchi hiyo imewaachia mahabusu wengi kutoka magereza ya Venezuela hadi Marekani.
Lakini muda mfupi baada ya Trump, kutoa kauli hizo, Rais Nicolas Maduro kupitia hotuba yake ya kila mwezi kwa taifa alisema yeye yuko tayari kuzungumza ana kwa ana na kila mmoja nchini Marekani ambaye angehitaji kuzungumza kuhusu Venezuela.
Rais huyo aliongeza na hapa namnukuu: “Nchi hii itaendelea kuwa katika amani, na huko Marekani ikiwa kuna mtu yeyote anayetaka kuzungumza na Venezuela ana kwa ana tuko tayari bila tatizo.” Mwisho wa kumnukuu Maduro, ambaye kuchaguliwa kwake kwa mara ya pili mwaka jana kuliifanya Marekani kushindwa kumtambua.
Kikosi cha wanamaji cha Marekani kinafanya mazoezi Trinidad na Tobago
Kwa sasa kikosi cha wanamaji cha Marekani kinaendelea kufanya mazoezi katika kisiwa cha Trinidad na Tobago, zoezi linalofanyika kwa mara ya pili ndani ya kipindi cha mwezi mmoja kwa ushirikiano na kisiwa hicho ambacho kiko katika umbali wa kilomita kumi tu kutoka mpaka wake na mwambao wa bahari wa nchi ya Venezuela.
Hata hivyo waziri mkuu wa Trinidad na Tobago, Kamla Persad-Bissessar, alisema muda mfupi baadaye kwamba nchi yake haiwezi kuruhusu ardhi yake itumiwe kwa mashambulizi ya jirani yake Venezuela na kwamba hata hivyo hawajaombwa na mtu yeyote kufanya hivyo.
“Marekani haijawi kutuomba sisi ili kutumia ardhi yetu kwa ajili ya kuwashambulia watu wa Venezuela” amesema waziri huyo mkuu wa Trinidadi and Tobago ambaye ni mshirika wa karibu wa Rais Trump kupitia ujumbe wa watsap kwa shirika la habari la Ufaransa AFP
Aliongeza na hapa namnukuu ” Trinidad na Tobago haitashiriki katika kitendo chochote ambacho kinaweza kuwaathiri watu wa Venezuela” mwisho wa kumnukuu huku akiendelea kusisitiza kwamba Washington na Caracas zinapaswa kutatua tofauti zao kwa njia ya mazungumzo.
Venezuela imeilaumu Marekani kuupindua kwa lazima utawala nchini humo kwa kuendelea kuongeza zana za kijeshi karibu na mpaka wake ikiwa ni pamoja na manowari za kivita, na ndege ndogo zisizoonekana kwa macho angani. Kwa upande wake Washington inamlaumu Rais Nicolas Maduro kuongoza genge la maghaidi wanaofanya biashara za madawa ya kulevya madai ambayo hadi sasa Maduro amekuwa akiyakanusha vikali.
Kulingana na shirika la habari la AFP watu 83 hadi sasa wameuawa na vikosi vya Marekani ambavyo siku zote hufanya doria baharini ambao walishukiwa kusafirisha madawa ya kulevya kwa njia za magendo hadi Marekani. Lakini Marekani haijadhibitisha ikiwa watu hao waliouawa kutoka maeneo ya Carribean na mashariki mwa bahari ya Pacific walikuwa ni maghaidi na wasafirisha madawa ya kulevya au la.