Dodoma. Soko la usafiri wa mitandaoni mijini linazidi kuongeza ushindani baada ya Kampuni ya kimataifa ya Maxim kuzindua rasmi huduma zake katika mikoa ya Dodoma, Mwanza na Morogoro.
Soko la usafiri wa mijini limekuwa likikua kwa kasi na kuvutia majukwaa mbalimbali ya kimataifa na kikanda kama Uber, Bolt na InDrive.
Maxim, iliyoanzishwa mwaka 2003 na ambayo sasa inafanya kazi katika zaidi ya miji 1,000 duniani, inatoa usafiri wa pikipiki, bajaji, magari pamoja na huduma za kusafirisha mizigo kupitia programu ya simu janja.
Akizungumza wakati wa uzinduzi, Mkuu wa Maxim kwa Mkoa wa Dodoma, Franklin Foy amesema kampuni hiyo inakuja si tu kuongeza chaguo kwa abiria, bali pia kuwashika mkono madereva washirika ili kupata kipato chenye tija kupitia mfumo wa kidijitali.
“Hatuko hapa kuongeza chaguo tu. Tupo hapa kuwasaidia madereva kupata kipato cha maana na kurahisisha maisha ya abiria kupitia huduma zetu za kidijitali,” amesema.
Huduma za Maxim zinalenga wateja wanaotafuta usafiri nafuu, kwa kuweka nauli za kuanzia Sh500 katika mikoa ya Mwanza na Morogoro, na Sh1,000 kwa Dodoma ambapo abiria wanaweza kuchagua kati ya pikipiki, bajaji, gari au huduma ya delivery, nauli zikiwa kuanzia Sh1,000 kwa pikipiki, Sh1,900 kwa bajaji na Sh3,000 kwa magari.
Kampuni hiyo imejipambanua kama jukwaa la gharama nafuu kwa kudai nauli zilizo karibu asilimia 15 chini ya wastani wa soko. Aidha, katika hatua ya mwanzo, madereva wapya wanaruhusiwa kuchukua asilimia 100 ya mapato yao kabla ya kampuni kuanza kutoza kamisheni ya hadi asilimia 25 kama kanuni za Mamlaka ya Udhibiti Usafiri Ardhini (Latra) zinavyoruhusu.
Sekta ya usafiri wa mtandaoni nchini inaendelea kubadilika, huku majukwaa kama Uber na Bolt yalioanzia Dar es Salaam yakiendelea kupanua huduma zao katika miji mingine mikubwa ikiwamo Dodoma, Arusha na Mwanza.
Mabadiliko haya yameibua ushindani na kubadili mtazamo wa wakazi wa mijini kuhusu matumizi ya teksi za kawaida.
Mwaka 2022, Latra ilipunguza kiwango cha juu cha kamisheni kutoka asilimia 33 hadi 15, hatua iliyosababisha Uber kusitisha baadhi ya huduma zake na Bolt kupunguza shughuli nchini.
Hata hivyo, kiwango hicho kilirekebishwa baadaye hadi asilimia 25 pamoja na ada ya booking ya hadi asilimia 3 ili kuweka usawa kati ya uwezo wa abiria na uendelevu wa kampuni na madereva.
Teknolojia imeendelea kuwa kitovu cha huduma za Maxim, ambapo abiria wanaweza kuona nauli kamili kabla ya safari, kufuatilia dereva kwa wakati halisi na kuagiza bidhaa mbalimbali kupitia programu hiyo.
Kwa upande wa usalama, kampuni inatumia mfumo wa internet calling kuficha namba za madereva na abiria, huku kitufe cha SOS kikisaidia kutuma tahadhari kwa timu ya msaada na madereva waliopo karibu.
Kuingia kwa Maxim kunatarajiwa kuongeza ushindani katika soko ambalo abiria wananufaika kwa kupata huduma nafuu na za uhakika, lakini ambalo madereva bado wanaibua hoja kuhusu mapato, kamisheni na maslahi ya kazi.
Utafiti unaonesha kuwa nafuu, ubora wa taarifa na urahisi wa kutumia programu ni miongoni mwa sababu zinazomfanya mteja kurudia kutumia huduma.
Kwa sasa, Maxim inaendelea kusajili wamiliki wa pikipiki, bajaji na magari kupitia programu yake ya madereva, huku ikiziona Dodoma, Mwanza na Morogoro kama vituo muhimu vya mkakati wake wa upanuzi katika mazingira ambako mahitaji ya huduma za usafiri wa kidijitali yanaongezeka kadiri miji inavyopanuka.