Marekani. Maisha yanaenda kasi sana kwa Jennifer Lopez (J.Lo), 56, ambaye amewahi kuvalishwa pete za uchumba mara sita maishani mwake, huku sasa akiwa single baada ya kuambulia talaka katika ndoa zote nne alizofunga!
Hata hivyo, historia hiyo ina faida kwake upande wa pili baada ya hivi karibuni kupewa dili lenye thamani ya Dola10 milioni, wastani wa Sh24.4 bilioni na kampuni ya Zen Diamond inayojihusisha na uuzaji wa vito.
Kupitia ushirikiano huo, Zen Diamond wanatarajia kuvutia wateja wengi hasa wanaohitaji pete kutokana na Lopez ana ushawishi mkubwa na uzoefu wa kutosha katika eneo hilo tangu mwishoni mwa miaka ya 1990.
Lakini chanzo kimoja kimeuambia mtandao wa Page Six kuwa fedha iliyopewa na kampuni hiyo ya Kituruki, bado ni ndogo ukilinganisha na ukubwa wa chapa ya Lopez, mwanamuziki na mwigizaji kutokea Marekani.
“Zamani alikuwa anapata dili kubwa sana. Alikuwa analipwa kati ya Dola20 hadi 50 milioni kwenye matangazo yake. Ndiyo maana nilishangaa, hicho ni kiasi kidogo sana kwa J.Lo,” chanzo hicho kilieleza.
Akiwa amevalia gauni jeupe la harusi lililoacha wazi mabega, pamoja na pete ya uchumba kidoleni, Lopez, mama wa pacha (Emme na Max, 17), aliutangazia ulimwengu kuwa yeye ndiye balozi wa Zen Diamond kimataifa.
“Anataka kuendelea kuzungumziwa tu, siyo mtu anayeangaika kutafuta fedha. Nafikiri J.Lo kwa sasa yuko kwenye wakati ambao anafanya chochote ili kubaki kuzungumziwa katika tasnia,” chanzo kilidai.
Mwenyekiti wa Zen Diamond, Emil Guzelis, kwenye taarifa yake alisema Jennifer Lopez ni zaidi ya chapa ya kimataifa anawakilisha nguvu, uhalisia na uzuri usiozoeleka.
Kwa sasa Lopez yupo single baada ya kuachana na Ben Affleck. Mkali huyo wa kibao cha All I Have (2002), aliomba talaka kutoka kwa Affleck (53), Agosti 2024, ikiwa ni miaka miwili tangu walipofunga ndoa huko Las Vegas.
Affleck alimvisha Lopez pete ya almasi ya kijani pindi waliporudiana mwaka 2021, ikiwa ni mara ya pili kwao kuwa katika uhusiano baada ya kutengana mwanzoni mwa miaka ya 2000.
Mara ya kwanza, mwaka 2002, Affleck alimvisha pete ya almasi ya pinki kutoka Harry Winston ikiwa na thamani ya Dola1.2 hadi 2.5 milioni. Hata hivyo, walitengana 2004, na inadaiwa Lopez alihifadhi pete hiyo.
Kabla ya Affleck, Lopez alikuwa amechumbiwa na Alex Rodriguez, ambaye walianza kutoka mwaka 2017. Rodriguez alimvisha pete ya almasi yenye karati 15 mnamo 2009 lakini walikuja kuachana miaka miwili baadaye.
Ndoa ya kwanza ya Lopez ilikuwa kati yake na mwigizaji Ojani Noa mwaka 1997 kabla ya kuachana mwaka mmoja baadaye. Kisha aliolewa na Cris Judd mnamo 2001 na kuachana 2003.
Baadaye mwaka 2004 aliolewa na Marc Anthony ambaye ndiye baba wa pacha wao, Emme na Max. Walidumu kwa miaka 10 kabla ya kuachana 2014. Hivyo kupewa dili la kuuza pete ni sahihi ana ushawishi na uzoefu wa miaka mingi.
Mwaka 2016, Lopez akiongea na InStyle alizungumzia tukio la kuahirishwa kwa ndoa yake na Affleck iliyopangwa kufungwa Septemba 14, 2003 huko Santa Barbara, kufuatia kuandamwa na vyombo vya habari.
“Sasa angalau naweza kukuonyesha mimi ni nani, kipindi kile watu waliamini chochote walichosoma kwenye magazeti ya udaku. Mara nyingi haikuwa kweli au ukweli ulikuwa kama theluthi moja!,” alisema Lopez.
Ikumbukwe baada ya kupata umaarufu kupitia filamu, ndipo Jennifer Lopez (J.Lo), akageukia muziki na kuja kuweka rekodi kama mwanamke wa kwanza Marekani kushika namba moja katika chati ya filamu na muziki.