Chanzo cha picha, JACQUELINE PENNEY/AFPTV/AFP via Getty Images
Watumiaji wa mitandao ya kijamii ya Kiarabu wameonyesha hasira zao juu ya shambulio la Israel dhidi ya Qatar, ambapo liliwalenga viongozi wakuu wa Hamas, na kuzua swali la ni nchi gani inaweza kuwa shabaha inayofuata ya mashambulizi ya Israel.
Baadhi yao wametaja Misri, Saudi Arabia, na Uturuki.
Baadhi ya watumiaji pia walizinyooshea kidole cha lawama Marekani na Uingereza, wakizituhumu kuhusika na shambulio hilo na kutaka nchi za Ghuba ya Uajemi na ulimwengu wa Kiarabu zichukuliwe hatua za pamoja ili kuizuia Israel kufanya mashambulizi hayo.
Mnamo Septemba 10, alama za reli kadhaa za Kiarabu, zikiwemo “Doha,” “Misingi ya Marekani,” “Israel,” pamoja na majina ya nchi za Kiarabu, zilivuma kwenye mtandao wa kijamii wa X zikipata machapisho zaidi ya 598,000.
Lengo linalofuata ni lipi?
Watumiaji wengi wa mitandao ya kijamii wanaamini kuwa shambulio la Doha lilikuwa “ujumbe wa wazi” wa Israeli kwamba inaweza kulenga nchi zingine za Kiarabu, haswa Misri.
Kiongozi wa upinzani nchini Misri Tareq Habib hakuondoa uwezekano wa Israel kushambulia Riyadh au Cairo, akisema: “Hii ni rahisi zaidi kuliko inavyoonekana.”
Pia aliwataka wafuasi wa Rais wa Misri Abdel Fattah al-Sisi kuelewa kwamba nchi hiyo “iko hatarini.”
“Israeli imesema waziwazi kwamba hakuna kinga kwa viongozi wa Hamas popote pale,” asema mwandishi wa habari na mtafiti wa Misri Rania Badawi, akionya kwamba hii ina maana kwamba “kukaribisha wajumbe wao si hatari ya kisiasa tena, bali tishio la moja kwa moja kwa usalama wa taifa.”
Akaongeza: “Wale wanaosema ‘Misri si Qatar’ na Israel haithubutu kufanya jambo kama hilo ni sahihi kimantiki, lakini wanapuuza ukweli kwamba ukweli wa leo umepinga mantiki na kwamba kile ambacho hakikuwezekana jana kinatokea kila siku mbele ya macho yetu leo.”
Mtumiaji wa mtandao nchini Jordan aliandika kwamba “baada ya shambulio la Doha, macho yote yanaelekezwa kwa Misri,” akionya kwamba “mradi wa Kizayuni na Marekani hauna mipaka: usaliti, kuzingirwa, kulipua mabomu … Wanaiweka Mashariki ya Kati katika moto na udhalilishaji hatua kwa hatua.”
Aliongeza: “Yeyote anayejiona yuko salama leo atakuwa shabaha kesho!”
Wakati huo huo, Khaled Farid Salam alipendekeza katika chapisho la Facebook kwamba Uturuki inaweza pia kuwa shabaha inayowezekana kutokana na hatua za hivi karibuni katika eneo hilo.
Hata hivyo, alibainisha kuwa “upande wa Misri ndio nyeti zaidi,” kwa sababu ikiwa ni pamoja na nchi hiyo kuwa miongoni mwa maeneo yenye migogoro na inakabiliwa na mgogoro mkubwa wa kiuchumi.
Mchambuzi wa kisiasa wa Kuwait Mohammed Hayef Al-Mutairi alisema kuwa Israel “haitaki amani, wala mazungumzo, bali inataka kulazimisha utawala juu ya ulimwengu wote wa Kiarabu.”
Ametoa wito kwa nchi ambazo zimerekebisha uhusiano wao na Israel kuangalia upya misimamo yao.
Kundi la “Omanis Against Normalizing Relations with Israel” kwenye mtandao wa kijamii wa X liliandika katika ujumbe kwa wafuasi wake zaidi ya 112,000: “Jana Tunisia, leo Doha, na kesho nchi yangu na nchi yako.”
Chanzo cha picha, @PRES_IQ/X, @FREEDOM_HONEST/X
Marekani yatoa ruhusa
Watumiaji wengine walionyesha jukumu la Marekani na Uingereza, na vile vile “ushirikiano wa serikali za Kiarabu” katika shambulio hili la anga.
Ali Al-Sand, mwanahabari wa Kuwait na msomi, alisema kuwa Marekani imeonyesha “taa ya kijani” kwa shambulio hilo kufanyika.
Mtumiaji wa Imtandao wa kijamii nchini Iraq pia alichapisha katuni ambayo Rais wa Marekani Donald Trump, akiwa ameshikilia sanduku lililojaa pesa kutoka nchi za Ghuba ya Uajemi, akiagana na Amir wa Qatar, Rais wa UAE, na Mrithi wa Kifalme wa Saudi Arabia – ambao wanaonyeshwa katika nguo zao za ndani – na kupanda ndege.
“Walipigwa kwa pesa zao wenyewe,” aliandika katika kuelezea mpango huo, na kuongeza, “Pesa haiwalindi waoga.”
Mshawishi wa Oman Khalid bin Seif alisema kwamba ikiwa nchi za Ghuba “hazitaungana katika kutangaza wazi vita dhidi ya Wazayuni na kukata uhusiano wao na Marekani, hakuna jibu lingine litakuwa la thamani.”
Ishaq Ali, mwanaharakati wa zamani wa haki za binadamu wa Saudi ambaye sasa anaishi New Zealand, alisema mashambulizi hayo yanaakisi “kuibuka kwa Israel Kubwa.”
Baadhi pia wamekosoa uwepo wa kambi za kijeshi za Marekani nchini Qatar, wakisema kuwa kambi hizo ni vituo vya “uchokozi wa vita,” huku wengine wakisisitiza: kambi hizo zipo tu ‘kulinda Israeli.”