Chanzo cha picha, Getty
-
- Author, Graham Fraser
- Nafasi, BBC
Kampuni ya Apple itazindua iPhone mpya wiki hii, isiyotumia kadiwia ya plastiki (sim card). Na hilo limezua maswali kuhusu mustakabali wa kadiwia.
Kadiwia ni kadi ndogo ya plastiki ambayo watumiaji huiingiza kwenye simu zao ili kupata mawasiliano. Lakini kwa wanunuzi wa iPhone Air, kadiwia hizo hazitakuwepo tena.
Simu hii mpya itatumia mfumo wa eSim (kadiwia za kidijitali) – ambao unaruhusu watumiaji kubadili mitandao ya simu wanaotaka kutumia, bila ya kuchomeka kadiwia ya plastiki kwenye simu.
Mchambuzi Kester Mann, kutoka CCS Insight, aliiambia BBC kwamba tangazo la Apple “linaashiria mwanzo wa mwisho wa kadiwia za plastiki”.
Lakini itachukua muda gani kabla sote hatujatupa vipande vidogo vya chipu za plastiki – na italeta tofauti gani kwa jinsi tunavyotumia simu zetu?
Kadiwia za kidijitali & Kadiwia za plastiki
Chanzo cha picha, Getty
Kadiwia ni sehemu muhimu ya simu yako – hukuruhusu kuunganishwa na mtoa huduma wako wa mtandao wa simu, kwa ajili ya mawasiliano ya mazungumzo, kupokea na kutuma jumbe fupi, na kutumia kwa ajili ya huduma ya intaneti.
Katika miaka ya hivi karibuni, eSim (kadiwia za kidijitali) zimeibuka kama njia mbadala na katika simu mpya zinazoingia mitaani watumiaji wana chaguo la kutumia kadiwia ya plstiki au kadiwia za kidijitali.
Siku ya Jumanne, katika tangazo la simu mpya yaa iPhone Air mpya – ambayo ni mpya zaidi, nyembamba zaidi, kampuni hiyo ya Apple imesema simu hizo zitatumia kadiwia za kidigitali tu.
Ni mara ya kwanza kwa iPhone yenye kutumia kadiwia ya kidijitali pekee kuingia sokoni duniani kote. Lakini wateja nchini Marekani wamekuwa na iPhone zinazotumia kadiwia za kidigitali pekee tangu 2022.
Licha ya hapo, Apple bado haijaachana kabisa kadiwia za plastiki moja kwa moja.
Ingawa ni kweli kwamba iPhones zingine mpya ilizotangaza wiki hii sokoni – ikiwemo iPhone 17, 17 Pro, 17 Pro Max – zitakuwa na kadiwia za kidijitali katika masoko kadhaa duniani, lakini katika nchi nyingi simu hizo bado zitakuwa na nafasi ya kuweka kadiwia ya plastiki.
Watengenezaji wengine wakuu wa simu kama, vile Samsung na Google, wanakumbatia kadiwia za kidijitali lakini bado wanazalisha simu zinazotumia kadiwia za plastiki ili kupata mawasiliano.
Hata hivyo, wataalamu wanasema hakuna shaka kuhusu mwelekeo wa teknolojia.
Kulingana na takwimu za CCS Insight, simu janja bilioni 1.3 zilizo na kadiwia za kidijitali zilitumika kufikia mwisho wa 2024. Idadi hiyo inatarajiwa kufikia bilioni 3.1 kufikia 2030.
“Baada ya muda, tarajia kadiwia za plastiki zitatoweka kabisa,” anasema Paolo Pescatore, mchambuzi wa teknolojia kutoka PP Foresight.
Kadiwia za kidijitali zina faida gani?
Chanzo cha picha, Getty
Bw Pescatore anasema kutumia kadiwia za kidijitali kunatoa “faida nyingi. Moja wapo ni kuokoa nafasi ndani ya simu, hivyo kuruhusu betri kubwa zaidi.
Pia ni manufaa kwa mazingira, hakutokuwa na kadi za plastiki zitakazo zagaa kwenye mazingira.
Faida nyingine ni kwamba kadiwia za kidijitali anaamini kwa watu wanaposafiri nje ya nchi watakuwa na chaguo zaidi la kuchagua mtandao wa kumpa huduma bila kufanya malipo makubwa ya kununua kadiwia ya plastiki.
Kester Mann anasema itaokoa muda kwani mteja hatokuwa na uhitaji wa kwenda kwenye duka la simu kununua au kubadilisha kadiwia yake ya plastiki.
Lakini anasema, kama mabadiliko yote, mabadiliko haya pia yanahitaji elimu.
“Mabadiliko hayo yanaweza kuwa ni makubwa hasa miongoni mwa watu ambao hawatumii sana teknolojia. Hivyo sekta hiyo inahitaji kufanya kazi kwa bidii ili kutoa elimu ya jinsi ya kutumia kadiwia za kidijitali,” anasema Mann.