Kituo cha Kudhibiti Magonjwa cha Afrika (Africa CDC) kimetangaza mpango wa ufadhili wa dola bilioni 3.2 ili kuimarisha uzalishaji wa dawa na chanjo ndani ya bara la Afrika.
Kwa mujibu wa Abebe Getenu, mratibu wa uzalishaji wa ndani katika Africa CDC, ufadhili huo unajumuisha dola bilioni 2 kutoka Benki ya Afreximbank kwa ajili ya miundombinu ya viwanda, pamoja na dola bilioni 1.2 kutoka Mpango wa Gavi wa Kuendeleza Uzalishaji wa Chanjo Afrika, ambao utatolewa iwapo wazalishaji watafikia viwango vya ubora vilivyowekwa na Shirika la Afya Duniani (WHO).
Akizungumza katika mkutano na watengenezaji wa dawa nchini Uganda, Abebe Getenu alieleza kuwa Africa CDC inaendelea kusaidia kampuni mbalimbali kufikia viwango hivyo vya kimataifa, na inaunda Mfumo wa Pamoja wa Ununuzi wa Afrika ili kuhakikisha mahitaji ya soko.
Brenda Nakazibwe, kiongozi wa timu ya Uchumi wa Vimelea katika Ofisi ya Rais wa Uganda, alisisitiza dhamira ya Uganda katika kuendeleza uzalishaji wa ndani ili kupunguza utegemezi wa dawa, chanjo, na vifaa vya uchunguzi vinavyoagizwa kutoka nje tatizo linaloikumba Afrika kwa ujumla.
Katika mkutano uliofanyika Matugga, Wilaya ya Wakiso nchini Uganda, maafisa wa Africa CDC walitembelea kiwanda kinachozalisha dawa za maumivu na viuavijasumu, wakitathmini uwezo wake wa kuchangia malengo ya bara.