Serikali ya Indonesia imesisitiza kuwa, inafungana kikamilifu na malengo matukufu ya Palestina.
Akisisitiza msimamo wa kimsingi wa Jakarta kuhusiana na Palestina, Waziri wa Mashauri ya Kigeni wa Indonesia ametangaza kwamba kutambua uhuru na mamlaka ya Palestina ndio kipaumbele cha juu cha sera za kigeni za nchi hiyo. Akijibu matamshi ya Benjamin Netanyahu Waziri Mkuu wa utawala wa kizayuni wa Israel, Menlu Sugiono alisema kuwa maono yoyote ya baadaye kwa Israel lazima yaanze kwa kutambua uhuru na mamlaka ya Wapalestina.
“Hatutajadili jambo lingine lolote kabla ya hapo. Kutambuliwa kwa taifa la Palestina lazima liwe kipaumbele na hilo ndilo tutakalofuatilia,” aliongeza.
Kufungamana na kuwa pamoja Indonesia kwa kadhia ya Palestina kulianzia kwa rais mwanzilishi wa nchi hiyo, Sukarno, ambaye alitangaza mwaka 1962: “Maadamu uhuru wa Palestina bado haujarejeshwa kwa Wapalestina, jukumu la Indonesia daima litakuwa ni kupinga kukaliwa kwa mabavu Palestina na Israel.”
Hayo yanajiri siku chache baada ya Indonesia kulaani mpango wa utawala wa Israel wa kuikalia kwa mabavu Gaza na kuzitaka nchi zote kulitambua taifa huru la Palestina. Wizara ya Mashauri ya Kigeni ya Indonesia imeandika kwenye ukurasa wake wa mtandao wa kijamii wa X: “Mpango wa Israel wa kuikalia kwa mabavu Gaza unakiuka kwa kiasi kikubwa sheria za kimataifa na Mkataba wa Umoja wa Mataifa, na unazidisha mzozo wa kibinadamu katika ukanda huo na kufifiza matarajio ya amani katika eneo hilo.”
Licha ya miito ya kila leo ya kukomeshwa jinai za Israel katika Ukanda wa Gaza, utawala ghasibu wa Israel ukipata himaya na uungaji mkono wa Marekani umeendelea kufanya mauaji ya kimbari dhidi ya Wapalestina huku Baraza la Usalama la Umoja wa Mataifa likishindwa kuchukua hatua ya maana ya kukomesha mauaji hayo.