Baraza la Usalama la Umoja wa Mataifa limeiwekea tena Iran vikwazo vilivyokuwa vimendolewa huko nyuma kwa mujibu wa makubaliano ya nyuklia ya 2015 katika hatua iliyochochewa na mataifa ya Ulaya bila sababu ya msingi ili kutia dosari miradi ya nyuklia ya Iran, huku baraza hilo likipuuza hatua ya nchi za Magharibi ya kuhujumu makubaliano hayo.
Baraza la Usalama la Umoja wa Mataifa limerejesha vikwazo hivyo jana na kusema kuwa litazuia mali za Iran zilizoko nje ya nchi, litasitisha mikataba ya silaha ya Jamhuri ya Kiislamu ya Iran na kulenga mpango wake wa ulinzi wa makombora.
Hatua hii imechukuliwa siku mbili baada ya Marekani na waitifaki wake kama ilivyotabiriwa kuipigia kura ya veto rasimu ya azimio lililokuwa limewasilishwa na China na Russia lililotaka kuakhirishwa utekelezaji wa utaratibu wa Snapback ndani ya makubaliano hayo ambao ungepelekea kurejeshwa vikwazo.
Nchi zilizopinga kuakhirishwa utekelezaji wa utaratibu wa Snapback pamoja na nchi waitifaki wa Washington wamechukua hatua hiyo lengo likiwa ni kuituhumu Jamhuri ya Kiislamu ya Iran eti “limeukengeusha” nje ya malengo ya amani mpango wake wa nyuklia. Huku wakiongoza harakati hiyo ya upinzani kwa miongo kadhaa sasa, nchi hizo waitifaki wa Washington mara kadhaa zimepuuza kushindwa Wakala wa Kimataifa wa Nishati ya Atomiki (IAEA) kuthibitisha madai yao hayo hata mara licha ya kuifanyia miradi ya nyuklia ya Iran inayoendeshwa mwa malengo ya kiraia ukaguzi mkali zaidi kuwahi kushuhudiwa katika historia ya wakala huo.
Marekani yenyewe mwaka 2018 ilijitoa kwa upande mmoja katika makubaliano ya nyuklia katika hatua iliyo kinyume cha sheria na mwaka 2010 nchi hiyo iligonga mwamba katika mkakati wake wa kuhuisha utaratibu wa Snapback katika hatua yake nyingine iliyo kinyume cha sheria sawa na hii.
Tehran kwa upande wake bado haijatoa jibu mkabala wa kuwekewa tena vikwazo lakini imekuwa ikilaani hatua yoyote ya kutaka kuirejeshea vikwazo Iran kwa sababu haina uhalali wowote wa kisheria na imekuwa ikiwakumbusha washirika wa Magharibi kwamba hatua zao wenyewe ndizo zimepelekea kushuhudiwa hali ya mambo ya hivi sasa.