Raia zaidi ya 100 wametekwa nyara katika mkoa wa Ituri katika shambulio la wanamgambo wa Codeco. Raia waliotekwa nyara walikuwa wakirejea kutoka soko la Bule.
Waathiriwa wengi walikuwa kwenye magari na pikipiki kabla ya kuvamiwa na wanamgambo wa Codeco.
Kiongozi wa shirika la kiraia la Bahema Nord, Charité Banza, anatoa wito wa kufanyika kwa operesheni ya pamoja ya FARDC na UPDF dhidi ya wanamgambo hao, ambao wanazusha ugaidi katika eneo hilo.
“Kulikuwa na watu zaidi ya 100 kwenye barabara hiyo. Jioni wafanyabiashara waliokuwa wakinunua bidhaa zao walikuwa kwenye malori na pia kulikuwa na pikipiki zilizokuwa na bidhaa, anasimulia. Wanamgambo kadhaa wa Codeco walifaya shambulio la kuvizia eneo la Lidda, wakawavamia wafanyabiashara hao, wakawavamia askari wa FARDCnyi waliokuwa wakisindikiza msafara huo.
Kwa mujibu wa ripoti ya ujumbe wa amani wa Umoja wa Mataifa wa Kongo, iliyotolewa hivi karibuni ni kuwa, CODECO, kundi la ADF na wanamgambo wengine wanahusika katika matukio mengi ya mauaji ya raia mashariki mwa Jamhuri ya Kidemokrasia ya Congo.
Tangu mwezi Novemba 2021 hadi hivi sasa, wanajeshi wa Uganda pamoja na wenzao wa Jamhuri ya Kidemokrasia ya Congo, wamekuwa wakishirikiana katika operesheni za pamoja za kupambana na genge la waasi la ADF na makundi mengine ya waasi mashariki mwa DRC.
Hata hivyo hadi sasa operesheni ya pamoja ya jeshi la Jamhuri ya Kidemokrasia ya Congo na mataifa jirani hazijaweza kusambaratisha makundi ya waasi katika nchi hiyo kwani hali ya usalama hususan mashariki mwa DRC inazidi kuzorota siku baada ya siku.