Vikwazo hivyo vilivyorejeshwa na Umoja wa Ulaya iliyo na nchi wanachama 27, vinajumuisha hatua za Umoja wa Mataifaza kupiga marufuku shughuli zinazohusiana na mpango wa nyuklia na makombora ya masafa marefu.
Iran pia imewekewa vikwazo vya kifedha, vinavyojumuisha kuzuiliwa kwa mali ya benki kuu ya Iran pamoja na marufuku ya kusafiri kwa viongozi kadhaa wa taifa hilo. Vikwazo hivyo vya Umoja wa Ulaya pia vinapiga marufuku ununuzi na usafirishaji wa mafuta ghafi, uuzaji na usambazaji dhahabu na vifaa vya meli.
Vikwazo vya EU vinafuatia vile vya Umoja wa Mataifa vilivyowekwa hapo jana baada ya mataifa matatu ya Magharibi, Ufaransa, Ujerumani na Uingereza kuvirejesha zikisema Iran imekiuka makubaliano ya nyuklia ya mwaka 2015 ambako nchi hiyo ilipaswa kuachana na mpango wake wa kutengeneza silaha za nyuklia.
Licha ya hatua hizo kuchukuliwa, viongozi wa mataifa ya Magharibi wamesisitiza kuwa bado milango ya mazungumzo ipo wazi. Mkuu wa sera za kigeni wa umoja wa Ulaya Kaja Kallas, amesema kuwekewa vikwazo hivyo hakumaanishi mwisho wa diplomasia na Jamhuri hiyo ya kiislamu.
Iran yavikosoa vikwazo ilivyowekewa
Iran imevikosoa vikali vikwazo hivyo ikisema sio halali. Spika wa bunge la nchi hiyo Mohammad Bagher Ghalibaf, ameionya Magharibi kwamba hatua iliyochukuliwa itapata majibu makali.
“Jamhuri ya Iran inachukulia urejeshwaji wa vikwazo hivi kutokuwa halali. Tunatangaza kuwa nchi yoyote itakayochukua hatua dhidi ya Iran ikizingatia vikwazo hivi haramu itapokea majibu makali kutoka kwetu, na nchi tatu za Magharibi zilizochukua hatua hii nazo pia zitashuhudia majibu yetu.”
Iran kurejeshewe tena vikwazo kunamaanisha ni mwisho wa mpango wa miaka 10 kuhusu nyuklia ya Iran, uliopitishwa mwaka 2015 na Iran, Uingereza, Ujerumani, Ufaransa, Marekani, Urusi na China na huenda hatu hiy ikachochea mvutano zaidi katika kanda ya Mashariki ya Kati miezi kadhaa baada ya Israel na Marekani, kushambulia vinu vya nyuklia vya Iran mwanzoni mwa mwezi Juni.
Huku hayo yakiarifiwa serikali ya Israel imesema inafahamu wapi Jamhuri hiyo ya kiislamu ilipoweka takriban kilo 400 za Urani, zinazodaiwa kuwa zimerutubishwa karibu kufikia kiwango cha kutengeneza silaha za nyuklia.
Awali Mkuu wa shirika la Umoja wa Mataifa la kusimamia masuala ya nyuklia (IAEA) Rafael Grossi, alisema Iran imekataa kufichukua mahali urani hizo zilikohifadhiwa. Waziri Mkuu wa Israel Benjamin Netanyahu amesema nchi yake inajua mahali zilikohifadhiwa na tayari imetoa taarifa za kijasusi kwa Marekani.