Harakati ya Muqawama wa Kiislamu ya Palestina HAMAS imelaani mpango ulioripotiwa kuwa umeandaliwa na Marekani wa kumetua waziri mkuu wa zamani wa Uingereza Tony Blair awe liwali wa Ukanda wa Ghaza, na kusisitiza kwamba watu wa Palestina wanao uwezo wa kusimamia mambo yao wenyewe.
Mjumbe mkuu wa ofisi ya kisiasa ya Hamas, Husam Badran ameandika kwenye mtandao wa kijamii wa Telegram leo Jumatatu kwamba kumjumuisha Blair katika mpango wowote wa kusitisha mapigano “ni ishara ya nuhusi kwa watu wa Palestina.”
Badran ameandika hayo akijibu ripoti iliyotolewa na gazeti la kila siku la Israel la Haaretz kwamba Marekani inafikiria uwezekano wa kumteua Blair awe sehemu ya mipango ya baada ya vita vya vinavyoendelezwa na utawala wa kizayuni wa Israel dhidi ya Ghaza.
Huku akimwita Blair “ndugu wa shetani,” kiongozi huyo mwandamizi wa Hamas amesisitiza kuwa badala ya waziri mkuu huyo wa zamani wa Uingereza gavana wa muda wa Gaza, “[anastahili] kusimamishwa mbele ya mahakama za kimataifa kwa uhalifu wake, hasa nafasi yake katika vita vya Iraq (2003-2011).”
Badran amemuelezea zaidi Blair kuwa ni mtu ambaye “hajaleta lolote jema kwa piganio tukufu la Palestina, Waarabu au Waislamu, akibainisha kwamba “nafasi yake ya uhalifu, uharibifu imekuwa ikijulikana kwa miaka mingi.”
Amesisitiza kuwa, kusimamia masuala ya Wapalestina huko Ghaza au Ukingo wa Magharibi wa Mto Jordan ni suala linaloihusu Palestina tu na linapasa liamuliwe kwa makubaliano ya kitaifa na si kuamriwa na wadau wa kikanda au kimataifa.
“Watu wa Palestina wanao uwezo wa kujisimamia wenyewe; tuna rasilimali na utaalamu wa kuendesha mambo yetu wenyewe na uhusiano wetu na eneo na dunia kwa ujumla,” amesisitiza Badran.
Kadhalika amekumbusha kuwa, Hamas haina nia ya kutawala Ghaza wala Palestina bila ya ushiriki wa makundi mengine ya Palestina na akaongeza kuwa, hata kabla ya mwezi Disemba 2023 na kushadidi mauaji ya kimbari yanayofanywa na utawala wa kizayuni wa Israel, harakati hiyo ya ukombozi iliitaarifu mirengo na asasi nyingine za Palestina kuhusu msimamo huo.
Gazeti la Times of Israel liliripoti Septemba 17 kwamba Tony Blair ametayarisha pendekezo la kina, akiungwa mkono na Rais wa Marekani Donald Trump na mkwewe Jared Kushner, la kuanzisha kile kinachoitwa Mamlaka ya Mpito ya Kimataifa ya Gaza (GITA)…/