Katika siku za hivi karibuni wimbi la maandamano makubwa ya kote duniani limeongezeka sana huku makumi ya maelfu ya watu wakimiminika mitaani katika miji mbalimbali ikiwemo Liverpool, Cape Town na miji ya Ujerumani kupiga kelele za kulaani mauaji ya kimbari ya Ghaza yanayofanywa na Israel.
Kwa mujibu wa Iran Press, huko mjini Liverpool umati mkubwa wa watu wameandamana katikati ya mji kabla ya kuanza mkutano wa Chama cha Labor na kuilaani serikali ya Uingereza kwa kuhusika waziwazi na jinai za kivita za utawala wa Kizayuni. Waandamanaji hao wamemkosoa Waziri Mkuu wa Uingereza Keir Starmer kwa kuupa silaha utawala wa Kizayuni unaozikalia kwa ardhi za Wapalestina na kufanya mauaji ya kimbari huko Ghaza.
Mji wa Cape Town, Afrika Kusini pia, umeshuhudia moja ya maandamano makubwa zaidi dhidi ya Wazayuni kuwa kufanyika. Kuanzia Msikiti wa kihistoria wa Mtaa wa Muir hadi Bungeni, watu walibeba majeneza yaliyofunikwa bendera za Palestina huku wakipaza sauti zao wakisema: “Susia Utawala wa Kibaguzi wa Israel.”
Waandamanaji hao wamekumbushia mashinikizo la kimataifa dhidi ya utawala wa zamani wa ubaguzi wa rangi nchini Afrika Kusini na wameitaka serikali ya nchi hiyo kuweka vikwazo vikubwa zaidi dhidi ya Tel Aviv.
Maandamano kama hayo yamefanyika pia katika miji ya Seoul, Düsseldorf na Barcelona. Mjini Seoul wanafunzi na wanaharakati wa kisiasa walikusanyika mbele ya ubalozi wa Marekani na kufichua nafasi ya Washington katika kuunga mkono jinai za Wazayuni. Huko Barcelona, waandamanaji waliobeba bendera kubwa za Palestina waligeuza barabara kuu za jiji kuwa bahari ya upinzani na mshikamano.
Huko Berlin pia zaidi ya watu 100,000 wamefanya maandamano wakipinga uungaji mkono wa Ujerumani kwa mauaji ya kimbari ya Israel katika Ukanda wa Ghaza.