“Israeli lazima ikomeshe mashambulizi yote dhidi ya hospitali mara moja na kuhakikisha upatikanaji wa huduma za dharura za afya kwa Wapalestina wote waliojeruhiwa,” ilisema OHCHR katika taarifa yake iliyotolewa Ramallah na Geneva.
Kwa mujibu wa Ofisi hiyo, “mashambulizi makali dhidi ya miundombinu ya kiraia ikiwemo hospitali, kliniki na majengo ya makazi yameathiri kwa kiasi kikubwa mfumo wa afya uliokuwa tayari umedorora huko Gaza na kuzidisha hali mbaya ya kibinadamu kwa mamia ya maelfu ya Wapalestina waliokwama katika jiji la Gaza.”
Mashambulizi 17 yamerekodiwa dhidi ya hospitali
Tangu tarehe 16 Septemba, OHCHR imerekodi takriban mashambulizi 17 ya Israeli dhidi ya au karibu na vituo vya afya katika Jiji la Gaza. Miongoni mwa hospitali zilizoathirika moja kwa moja ni Hospitali ya Al Quds huko Tal Al Hawa, Hospitali ya watoto ya Al Rantisi kaskazini magharibi, na kituo cha afya cha Medical Relief katikati mwa jiji la Gaza.
Mashambulizi pia yameripotiwa karibu na kituo cha matibabu cha Al Shifa na Hospitali ya Al Ahli. Tarehe 22 Septemba, hospitali ya Uga ya Jordan huko Tal Al Hawa ililazimika kuhamia Khan Younis baada ya kuharibiwa na mashambulizi ya anga ya Israeli imeongeza taarifa hiyo.
Siku iliyofuata, Shirika la Hilali Nyekundu la Palestina liliripoti kuwa wanajeshi wa ardhini wa Israeli walikuwa wanaizingira Hospitali ya Al Quds. Kufikia tarehe 25 Septemba, ni hospitali 7 pekee kati ya 13 Gaza City zilizokuwa bado zinafanya kazi, ingawa OHCHR imebainisha kuwa “ukali na ukubwa wa mashambulizi karibu nazo unafanya kuwa vigumu kwa wagonjwa kupata huduma salama.”
Wanaume wanapanda vizuizi vya jiko la jamii magharibi mwa Jiji la Gaza katika kutafuta chakula.
Wasiwasi kuhusu sheria za kimataifa
OHCHR imeikumbusha Israeli kuwa hospitali zina “ulinzi maalum chini ya sheria ya kibinadamu za kimataifa, na zinaweza kupoteza ulinzi huo tu katika hali zilizoainishwa katika sheria hizo za kimataifa”.
Taarifa hiyo imeongeza kuwa “Hata pale ambapo masharti haya yangeweza kutimia katika kesi ya vituo vya afya Gaza City, haiingii akilini vipi mashambulizi ambayo yamewaacha karibu watu wote bila huduma za matibabu ya kuokoa maisha yangelingana na kanuni ya uwiano katika mashambulizi”.
Ofisi hiyo ya haki za binadamu imeeleza kuwa Israeli, kama nguvu inayokalia ardhi ya Palestina, imeshindwa kutoa mbadala wa huduma za afya kwa waathirika ambao ni ukiukaji wa wazi wa wajibu wake kisheria.
Wito wa uwajibikaji
Kwa kuzingatia “uharibifu mkubwa wa majengo ya makazi, ufurushwaji wa idadi kubwa ya raia, na kauli kutoka kwa viongozi wa kisiasa kuhusu uharibifu wa Gaza City,” OHCHR imesema mfululizo wa mashambulizi hayo “unaleta wasiwasi mkubwa kuhusu kutendeka kwa uhalifu mbalimbali chini ya sheria ya kimataifa.”
Chombo hicho cha Umoja wa Mataifa kimeiitaka Israeli “kusitisha operesheni zake za kijeshi Gaza, ikiwemo mashambulizi yake ya kikatili dhidi ya hospitali na maeneo mengine ya kiraia, na kuruhusu kuingia kwa urahisi msaada wa kibinadamu, ikiwemo chakula na vifaa vya matibabu.”
OHCHR imehitimisha taarifa yake kwa kusisitiza kuwa “Raia wa Gaza wanahitaji ulinzi wa haraka, njia salama za kufika hospitalini, na upatikanaji wa msaada wa kibinadamu,” ikiitaka jumuiya ya kimataifa “kuchukua hatua madhubuti za kusitisha uharibifu usio na maana, mauaji na ufurushaji wa watu, na kuishikilia Israeli ili iwajibike kwa ukiukaji wake mkubwa wa haki za binadamu na sheria za kimataifa unaoendelea Gaza.”