Iran imesema madai yaliyotolewa na Marekani na nchi za Ulaya kuhalalisha kurejeshwa kwa maazimio ya Baraza la Usalama la Umoja wa Mataifa dhidi ya nchi hii hayaziwajibishi nchi wanachama wa UN kuzingatia na kuheshimu hati za umoja huo zilizobatilishwa hapo awali.
Wizara ya Mambo ya Nje ya Iran ilitoa taarifa hiyo jana Jumapili baada ya Marekani, pamoja na Uingereza, Ujerumani, na Ufaransa (zinazojulikana kwa pamoja kama E3), kudai kuwa maazimio ya Baraza la Usalama la Umoja wa Mataifa dhidi ya Iran na vikwazo vinavyohusishwa nayo, vilivyoondolewa chini ya makubaliano ya nyuklia ya 2015, vimerejeshwa tena.
Imesema kuwa, hatua yoyote iliyo kinyume na au isiyoendana na Azimio Nambari 2231 la UNSC, lililoidhinisha Mpango Kamili wa Utekelezaji wa Pamoja (JCPOA), haiwezi kuwabebesha majukumu ya kisheria wanachama wa Umoja wa Mataifa.
“Kwa hivyo, Jamhuri ya Kiislamu ya Iran inapinga madai ya nchi tatu za Ulaya na Marekani kuhusu kurejeshwa kwa maazimio ya zamani ambayo yalibatilishwa chini ya Azimio 2231 mwaka 2015,” imesisitiza taarifa hiyo.
Wizara ya Mambo ya Nje ya Iran imebainisha kuwa, Washington na waitifaki wake wa Ulaya walitumia ndivyo sivyo na kinyume cha sheria utaratibu wa utatuzi wa mizozo ulioainishwa katika JCPOA na azimio nambari 2231 la kurejesha maazimio yaliyofutwa hapo awali dhidi ya Iran.
Mwezi uliopita, E3 ilianza mchakato wa kuamilisha utaratibu wa snapback, mchakato wa siku 30 wa kurejesha vikwazo vyote dhidi ya Iran.
Iran imepinga hatua hiyo na kusema ni kinyume cha sheria, ikitolea mfano hatua ya Marekani ya kujitoa katika mapatano ya JCPOA na uamuzi wa nchi hizo tatu za Ulaya wa kufungamana na vikwazo vilivyo kinyume cha sheria, badala ya kutekeleza majukumu yao ya JCPOA.