Balozi Chimbiri-Molande ambaye ni Mwakilishi wa Kudumu wa Malawi kwenye Umoja wa Mataifa jijini New York, Marekani amesema Malawi imejitolea kuwawezesha wanawake kushika nafasi za kiutendaji ndani ya ujumbe wa ulinzi wa amani.
Walinda amani wanawake na mchango wao kwenye migogoro
Amebainisha umuhimu wa askari wanawake wa ulinzi wa amani, ambao amesema, “huleta nguvu na uwezo wa kipekee hasa katika kushughulikia mahitaji maalum na uzoefu wa wanawake katika maeneo ya migogoro.”
Hivyo amesema Malawi inajengea uwezo wanawake kushika nafasi za kiutendaji ndani ya misheni za ulinzi wa amani. “walinda amani wanawake ni muhimu katika ulinzi wa amani. Wao huleta nguvu na uwezo wa kipekee hasa katika kushughulikia mahitaji maalum na uzoefu wa wanawake katika maeneo ya migogoro.”
Amesisitiza kuwa “juhudi hiyo si tu kwamba inawawezesha wanawake walioko kwenye huduma, bali pia inaimarisha kwa kiasi kikubwa ufanisi wa misheni zetu za ulinzi wa amani.”
Kwa mujibu wa Mwakilishi huyo wa kudumu, mafanikio ya mbinu hii yameanza kuonekana kwa kiasi kikubwa. Ushirikishwaji wa wanawake katika operesheni za ulinzi wa amani umeongeza matokeo chanya ya misheni hizo na pia umeleta athari nzuri kwa jamii zinazohudumiwa.
Malawi inaunga mkono Katibu Mkuu ajaye awe mwanamke
Kando ya ulinzi wa amani, Balozi Chimbiri-Molande ameelezea hatua pana ambazo Malawi imepiga katika kukuza usawa wa kijinsia na kuwawezesha wanawake na wasichana.
Amerejelea tena dhamira aliyosema ni thabiti ya serikali ya kuhakikisha ushiriki wa wanawake katika nyanja zote za jamii, akisisitiza kuwa “hakuna maendeleo ya kweli ya kijamii na kiuchumi yanayoweza kufikiwa iwapo nusu ya jamii itaachwa nyuma.”
Katika hatua ya kuunga mkono uongozi wa wanawake katika ngazi ya kimataifa, ameeleza uungwaji mkono wa Malawi kwa pendekezo la kumchagua Katibu Mkuu wa Umoja wa Mataifa mwanamke, akisema kuwa wanawake na wasichana “ndio msingi imara wa maendeleo ya kijamii.”
Asanteni kwa kutusaidia harakati dhidi ya ndoa za utotoni
Balozi. Chimbiri-Molande pia ameshukuru washirika wa maendeleo wa Malawi, wakiwemo Umoja wa Mataifa, kwa kuunga mkono juhudi mbalimbali zilizochangia usawa wa kijinsia.
Juhudi hizo ni pamoja na kutokomeza ndoa za utotoni, kupunguza mimba za mapema, kuongeza viwango vya wasichana kukamilisha elimu, na kuongeza ushiriki wa maana wa wanawake katika uongozi na maendeleo ya taifa.
“Kama taifa, tunaendelea kujitolea kuinua wanawake na wasichana, kwa sababu tunapowainua wao, tunainua jamii nzima,” amehitimisha.