Tawi hilo la kijeshi la Hamas kupitia Brigedi zake za Al-Qassam limewatolea wito wanajeshi wa Israel jana Jumapili kuondoka na kusitisha mashambulizi huko Gaza City kwa angalau masaa 24 ili wanamgambo hao wapate nafasi ya kuwasaka mateka hao ambao hatima yao inaweza kuibua kiwingu kwenye mkutano huu wa leo kati ya Waziri Mkuu wa Israel Benjamin Netanyahu na Rais Trump.
Trump ameliambia shirika la habari la Reuters kupitia mahojiano kwa njia ya simu kwamba amepata mwitikio mzuri mno kutoka Israel na kwa viongozi wa mataifa ya Kiarabu kuelekea pendekezo la mpango wa amani wa Gaza na kwa maana hiyo ni dhahiri kwamba kila mmoja sasa anataka kufikia makubaliano.
Kundi la Hamas hata hivyo limesema halijapata bado pendekezo lolote ama kutoka kwa Trump au kwa wasuluhishi.
Israel ilianzisha mashambulizi makubwa ya ardhini huko Gaza City ikiangusha majengo na kuwaagiza maelfu ya wakaazi kuondoka katika kile ambacho Netanyahu anasema ni jaribio la kuliangamiza kundi la Hamas. Lakini hata hivyo, katika siku chache zilizopita kumeshuhudiwa kuongezeka kwa mazungumzo ya suluhu ya kidiplomasia katika vita hivyo vilivyodumu kwa karibu miaka miwili sasa.
Mpango huu mpya una nini?
Mpango huo wa Trump unataka kurejeshwa mateka wa Israel wakiwa hai ama wamekufa, Israel kutoishambulia tena Qatar pamoja na duru mpya ya mazungumzo kati ya Israel na Palestina ya kuishi pamoja na kwa amani.
Jana Jumapili Netanyahu alikiambia kituo cha utangazaji cha Fox cha nchini Marekani kwamba Israel inafanyia kazi mpango mpya wa kusitisha mapigano, lakini bado kuna mambo wanayoendelea kuyashughulikia akishirikiana na timu ya Rais Trump.
Trump nae alidokeza jana Jumapili kupitia mtandao wake wa Truth Social kuhusu kile alichokitaja kama “mpango maalumu” kuhusu Mashariki ya Kati na kuongeza kuwa watahakikisha linafanikiwa licha ya Netanyahu kuapa mbele ya Baraza Kuu la Umoja wa Mataifa kwamba atahakikisha anamaliza kazi aliyoianza ya kuliangamiza kundi la Hamas.
Wachambuzi: ‘Netanyahu hana tena chaguo’
Netanyahu anazidi kuelemewa na shinikizo la kimataifa la kuvimaliza vita na hasa kufuatia mashambulizi yanayoendelea Gaza City. Vifo vilivyosababishwa na vita kati ya Israel na Hamas vimepindukia 66,000 hii ikiwa ni kulingana na Wizara ya Afya ya Gaza siku ya Jumapili.
Eytan Gilboa, mtaalamu wa masuala ya uhusiano wa Marekani na Israel kwenye Chuo Kikuu cha Bar-Ilan, amesema Netanyahu hana tena chaguo zaidi ya kukubaliana na mpango huo wa Trump.
Nchini Israel, baadhi ya mawaziri wa serikali ya muungano ya Netanyahu wametishia kujiengua ikiwa serikali itakubaliana na mpango huo ama kuvimaliza vita kabla ya kuliangamiza kundi hilo la Hamas. Hata hivyo, kiongozi wa upinzani Yair Lapid ameahidi kuliunga mkono bungeni na chama chake cha Yesh Atid ingawa bado haijulikani ikiwa vyama vingine vya upinzani pia vitafuata mkondo huo.
Huku hayo yakiendelea, jeshi la Israel mapema leo limesema limedungua makombora yaliyorushwa kutoka Yemen. Hata hivyo hakukuripotiwa vifo wala majeruhi kufuatia kisa hicho. Mifumo ya kujilinda ya Israel wakati wote huwa tayari kuzuia maroketi na droni zinazorushwa kutokea Yemen.
Tangu kuzuka kwa vita kati ya Israel na Hamas, waasi wa Houthi wanaoungwa mkono na Iran wamekuwa wakiishambulia Israel kwa makombora na droni, kama ishara ya kuwaunga mkono Hamas.