Matokeo rasmi yaliyochapishwa leo baada ya takribani vituo vyote kuhisabiwa yanaonesha kuwa chama tawala, Action and Solidarity, ama PAS, kimejinyakulia ushindi wa asilimia 50.1, huku muungano wa vyama vinavyopendelea kuendeleza mahusiano na Urusi, Patriotic Electoral Bloc, ukiwa na asilimia 24.2.
Muungano mwengine ambao pia una mahusiano ya karibu na Urusi umechukuwa nafasi ya tatu, ukifuatiwa na chama cha siasa za hamasa, Our Party, kilichoshika nafasi ya nne, huku chama cha mrengo wa kulia, Democracy at Home, kikipata kura za kutosha kuweza kuwa na uwakilishi bungeni.
Kiongozi wa chama tawala cha PAS, Igor Grosu, amewashukuru wapiga kura kwa imani yao kwa chama hicho, ingawa amedai wameshuhudia majaribio kadhaa ya Kremlin kuingilia uchaguzi huo kwenye jamhuri hiyo iliyowahi kuwa sehemu ya Muungano wa Kisovieti.
“Tunamshukuru kila aliyekwenda kituoni na kuitikia wito wetu wa kushiriki kwenye uchaguzi huu. Huu ni uamuzi muhimu kwa Jamhuri ya Moldova. Tuliona majaribio ya kuingilia mchakato wa uchaguzi yaliyofanywa na magenge ya kihalifu yanayoungwa mkono na Shirikisho la Urusi , majaribio ya kuchafua hali, vitisho vya mabomu, na uchokozi mwengine ndani ya Jamhuri yetu na hata nje.” Alisema Grosu.
Ulikuwa uchaguzi baina ya Ulaya na Urusi
Kuchaguliwa kwa chama PAS kunachukuliwa kama idhini ya wananchi wa Moldova kulitaka taifa hilo kuwa mwanachama wa Umoja wa Ulaya na kutoka kwenye ushawishi mkubwa wa Kremlin.
Rais wa Baraza la Ulaya, Antonio Costa, aliandika kupitia ukurasa wa X kwamba “Watu wa Moldova wametoa kauli yao na ujumbe wao ni wa sauti ya juu na wa wazi. Wamechagua demokrasia, mageuzi, na mustakabali wa Ulaya, licha ya shinikizo na uingiliaji kati kutoka Urusi.”
Mkuu wa Kamisheni ya Ulaya, Ursula von der Leyen , alisema ni wazi kuwa “Moldova imepigia kura Ulaya, demokrasia na uhuru,” akiongeza kuwa milango ya Umoja huo sasa iko wazi na akiahidi kusimama na taifa hilo daima.
Uchaguzi huo wa Jumapili (Septemba 28) uliangaliwa kama uwanja wa mapambano ya siasa za kilimwengu baina ya Urusi kwa upande mmoja na mataifa ya Magharibi yanayowakilishwa na Umoja wa Ulaya kwa upande mwengine.
Kwa ushindi huu wa kambi inayoelemea Ulaya, inatazamiwa kuwa Rais Maia Sandu, aliyekiasisi chama cha PAS mwaka 2016, atamuomba tena Waziri Mkuu Dorin Recean kuendelea kuunda serikali ijayo na kuendeleza kampeni ya kujiunga rasmi na Umoja wa Ulaya.
Vyanzo: RTRE/AP