Watu 95 wamefariki dunia kutokana na njaa pamoja na magonjwa katika kipindi cha siku 40 zilizopita kwenye kambi ya wakimbizi ya Abu Shouk huko El Fasher nchini Sudan. Hayo yameelezwa na wafanyakazi wa kujitolea.
Kulingana na ripoti iliyotolewa na mashirika ya misaada ya kibinadamu, matukio hayo yanaonesha hali inavyoendelea kuwa mbaya katika Mji wa El Fasher.
Kambi hiyo ambayo ilikuwa ikitoa hifadhi kwa wakimbizi wa ndani zaidi ya Elfu 19 imekuwa ikishambuliwa na makombora na ndege zisizokuwa na rubani, vifo vya raia vikiripotiwa wakati maelfu ya wengine wakitoroka kutafuta mahali salama.
Mwishoni mwezi Agosti, wapiganaji wa RSF walishambulia kambi hiyo na kutekeleza mauaji ya karibia watu 40 na kuwateka wengine kulingana ripoti za wanaharakati wa haki za binadamu.
Haya yanaripotiwa wakati wito umetolewa kwa jamii ya kimataifa kushinikiza pande hasimu kwenye mzozo wa Sudan kuhakikisha raia wanalindwa haswa wanapotorokea kwenye maeneo salama.
Wakati huo huo, jeshi la Sudan (SAF) limetangazaa kuwa limepata ushindi mkubwa katika mapambano yake na wapiganaji wa Vikosi vya Msaada wa Haraka (RSF) katika eneo la Kordofan, huko Magharibi mwa Sudan. Hata hivyo RSF wamekanusha madai hayo.
Jeshi la Sudan SAF linaloongozwa na Jenerali Abdel Fattah Al Burhan limesema kuwa, SAF imepata ushindi mkubwa kwenye operesheni zake katika jimbo la Kordofan Kaskazini, ikiwa ni pamoja na kuua mamia ya wanamgambo, kuteka zaidi ya magari 100 ya kivita na kukomboa maeneo kadhaa.
Tangu Mei 10, 2024, mapigano makali yamekuwa yakiendelea huko El Fasher kati ya SAF na washirika wake kwa upande mmoja, na RSF kwa upande mwingine. Mapigano yamezidi kuwa makali katika siku za hivi karibuni.