Mahakama nchini China imemhukumu adhabu ya kifo aliyekuwa waziri wa kilimo wa nchi hiyo baada ya kumpata na hatia ya ufisadi wa kupokea rushwa.
Kwa mujibu wa duru za habari, Mahakama ya Watu wa Changchuan katika jimbo la kaskazini-magharibi la Jilin imeeleza katika taarifa yake iliyotolewa siku ya Jumapili kwamba Tang Renjian, waziri wa zamani wa kilimo na masuala ya mashambani, alipokea rushwa ya zaidi ya yuan milioni 268, sawa na dola milioni 38 katika kipindi cha kuanzia mwaka 2007 hadi 2024.
Katika hukumu yake hiyo, mahakama imesema, hongo aliyopokea Tang “ilisababisha uharibifu mkubwa kwa maslahi ya serikali na taifa na inastahili hukumu ya kifo.”
Kwa mujibu wa mahakama ya Changchuan, Tang amekiri mashtaka na kueleza kwamba anajuta kwa aliyoyafanya.
Huko nyuma, Tang Renjian aliwahi kuwa gavana wa Mkoa wa Gansu kaskazini-magharibi mwa China na makamu wa gavana wa Mkoa unaojiendeshea mambo yake wa Guangxi Zhuang ulioko upande wa kusini mwa nchi.
Kutiwa hatiani na kuhukumiwa adhabu ya kifo Tang ni sehemu ya kampeni ya Rais Xi Jinping ya kupambana na rushwa, ambayo imepelekea kuporomoka katika nyadhifa zao shakhsia kadhaa wa ngazi za juu nchini China.
Kabla ya hapo, waliokuwa mawaziri wa ulinzi wa China Li Shangfu na Wei Fenghe nao pia waliachishwa kazi kwa tuhuma za ufisadi.
Li Shangfu alitimuliwa baada ya kushika wadhifa wa uwaziri wa ulinzi kwa muda wa miezi saba tu alipotuhumiwa kupokea hongo na akafukuzwa pia katika Chama cha Kikomunisti cha China…/