Msemaji wa Vikosi vya Ulinzi vya Yemen Brigedia Jenerali Yahya Saree amesema, jeshi la nchi hiyo limefanya operesheni maalumu ya shambulizi kwa kutumia kombora la ‘hypersonic’ aina ya Palestina 2 ndege zisizo na rubani dhidi ya miji ya Tel Aviv na Eilat ya utawala wa kizayuni wa Israel.
Saree ameeleza katika taarifa aliyotoa leo Jumatatu: “tumefanya operesheni maalumu ya kijeshi kwa kurusha kombora la balestiki la Palestina 2 dhidi ya shabaha nyeti katika Jaffa inayokaliwa kwa mabavu (Tel Aviv).
Msemaji wa Vikosi vya Ulinzi vya Yemen ameendelea kueleza: “operesheni hii wa fadhila za Mwenyezi Mungu imefanikisha malengo yake na kuwafanya mamilioni ya Wazayuni maghasibu wakimbilie kwenye maficho”.
Yahya Saree ameongeza kuwa, kikosi cha ndege zisizo na rubani cha Yemen nacho pia kimefanya shambulio kwa kutumia ndege mbili zisizo na rubani dhidi ya maeneo mawili muhimu ya adui huko Umm al-Rishrash (Eilat), ambazo pia zimefanikiwa kufikia malengo yaliyokusudiwa.
Msemaji wa Vikosi vya Ulinzi vya Yemen amesisitiza kwa kusema: “chaguo pekee lililo mbele ya taifa letu dhidi ya adui mzayuni ni kukabiliana naye na kusimama kidete na kutoa uungaji mkono wa kila namna kwa wananchi wa Palestina na Muqawama wao”.
Brigedia Saree ameongeza kuwa, wataendelea kutekeleza wajibu wao wa kidini, kimaadili na kibinadamu hadi uchokozi dhidi ya Ghaza utakapokomeshwa na mzingiro dhidi ya eneo hilo la Palestina utakapoondolewa.
Inafaa kuashiria kuwa, utawala wa Kizayuni leo asubuhi (Jumatatu) ulitangaza kufanywa shambulio la kombora la wanajeshi wa Yemen katika ardhi unazozikalia kwa mabavu…/