Uchunguzi wa hivi karibuni umebaini kuwa Uingereza iliukabidhi utawala katili wa Israel jumla ya risasi 110,000 katika mwezi Agosti, wakati jeshi la Israel likiendelea na vita ya mauaji ya kimbari dhidi ya raia Wapalestina katika Ukanda wa Gaza.
Kwa mujibu wa ripoti iliyochapishwa na kituo cha televisheni cha umma cha Channel 4 nchini Uingereza, usafirishaji huo, wenye thamani ya takriban pauni 20,000 (karibu dola 27,000), ni sehemu ya ongezeko kubwa la mauzo ya silaha kutoka Uingereza kwenda kwa utawala dhalimu wa Israel. Jumla ya usafirishaji wa silaha mwezi huo ulizidi pauni 150,000, kiwango cha pili kwa ukubwa tangu Januari 2022.
Ripoti hiyo ilibainisha kuwa bidhaa zilizopokelewa kupitia usafirishaji mmoja zilitajwa kama “risasi” kulingana na kitabu cha kodi cha forodha cha Israel.
Usafirishaji wa ziada mwezi huo ulijumuisha vipuri vya “mizinga,” vipuri “vya bunduki au bastola,” na kundi pana la “mengineyo” lililojumuisha makombora, vilipuzi, na risasi za aina mbalimbali.
Ripoti hiyo ilisema: “Uchambuzi wetu wa takwimu kutoka Mamlaka ya Kodi ya Israel unaonyesha kuwa silaha zenye thamani ya takriban pauni 400,000 ziliwasili kutoka Uingereza na kupita katika forodha ya Israel mwezi Juni 2025 , kiwango cha juu zaidi kwa mwezi mmoja tangu rekodi zilipoanza zaidi ya miaka mitatu iliyopita.”
Taarifa hii ilitolewa siku moja baada ya chama tawala cha Labour nchini Uingereza kupitisha azimio likisema kuwa Umoja wa Mataifa umetambua kuwa Israel inatekeleza mauaji ya kimbari dhidi ya Gaza, kauli inayopingana vikali na msimamo wa serikali ya Uingereza ambayo imekataa kutumia neno “mauaji ya halaiki.”
Mwezi Septemba 2024, Uingereza ilidai kusitisha takriban leseni 30 kati ya 350 za kuuza silaha kwa utawala wa Israel baada ya uchunguzi kubaini “hatari ya wazi kwamba baadhi ya silaha zinaweza kutumika kukiuka sheria za kimataifa za kibinadamu.”
Hata hivyo, serikali ilitoa idhini kwa vipuri vya ndege ya kivita aina ya F-35.
Shirika la haki za binadamu la Kipalestina, al-Haq, lililo katika Ukingo wa Magharibi unaokaliwa kwa mabavu, lilichukua hatua za kisheria mwezi Januari dhidi ya Wizara ya Biashara na Uwekezaji ya Uingereza (DBT) kuhusu uamuzi wa kuondoa vipuri hivyo kwenye marufuku.
Al-Haq na Mtandao wa Kimataifa wa Hatua za Kisheria (GLAN) unasisitiza kuwa serikali ya Uingereza inakiuka sheria za ndani na za kimataifa kwa kutumia mwanya wa kisheria unaoruhusu usambazaji wa vipuri kwa Israel kupitia hifadhi ya vipuri ya kimataifa na ushirikiano wa mataifa yanayotumia F-35.
Inasemekana kuwa Uingereza huchangia takriban asilimia 15 ya vipuri vinavyotumika katika ndege za kivita za F-35 zinazotumiwa na Israel kutekeleza jinai kote.
Tangu vita ya mauaji ya kimbari Gaza ilipoanza mwezi Oktoba 2023, mashambulizi ya Israel yameua angalau watu 66,200 na kuwajeruhi wengine 168,536. Wengi wa waathirika ni wanawake na watoto