Mwanza. Chama cha Alliance for Democratic Change (ADC) kimesisitiza kuwa endapo kitapata ridhaa ya kuingia madarakani, kipaumbele chake kitakuwa kuwawajibisha wote walioiba mali za umma.
Kauli hiyo imetolewa leo Oktoba 3, 2024 katika Wilaya ya Ilemela, wakati wa mwendelezo wa kampeni za mtaa kwa mtaa zinazofanywa na Mwenyekiti wa ADC Taifa, Shabani Itutu ambaye pia ni mgombea ubonge wa Ilemela mkoani Mwanza.
Itutu, ameeleza kuwa tatizo la ufisadi ndilo limekuwa chanzo kikuu cha changamoto nyingi zinazowakabili wananchi ikiwemo upungufu wa madawa hospitalini.
Kwa mujibu wa maelezo yake, zaidi ya Sh30 trilioni zimepotea kutokana na matumizi mabaya na ubadhirifu ulioainishwa kwenye ripoti za Mdhibiti na Mkaguzi Mkuu wa Hesabu za Serikali (CAG) tangu mwaka 2021.
Hata hivyo, licha ya wahusika kutajwa hadharani, Itutu amedai hakuna hatua za kisheria zilizochukuliwa dhidi yao.
“Tutadhibiti wizi wote wasiibe fedha za Serikali ili wananchi waweze kutibiwa bure. CAG ametutajia hadi watu, lakini hakuna fisadi hata mmoja amekamatwa na Sh30 trilioni ipo mikononi mwa watu.
“Na ndio maana ADC tunasema tukishinda urais na ubunge tunataka kuwakamata mafisadi wote waende jela warudishe fedha zetu zirudi kwa watanzania ziweze kuwasaidia,” amesema.
Chama hicho kimeweka wazi kuwa lengo lake litakuwa kuhakikisha kila mtu aliyehusika na uporaji wa mali za umma anafikishwa mbele ya vyombo vya sheria.
Ameeleza kwamba, mali zote zilizoibwa zitarejeshwa, hata kama wahusika walizihamisha kwenda nje ya nchi.
Amesema chama hicho hakitasita kuwafuatilia mafisadi popote walipo, akiwataka wahusika kujiandaa kurejesha fedha walizopora ili zirudi kutumika kwa maendeleo ya taifa.
Amesema, Ilemela imekuwa ikikabiliwa na tatizo la upatikanaji wa maji safi na salama akisema wakiingia madarakani watajenga miundombinu ya kudumu ikiwemo matenki ya kuhifadhia maji na mifumo ya usambazaji itakayofikia mitaa yote ya wilaya hiyo.
Aidha, kiongozi huyo ameahidi kushughulikia migogoro ya ardhi ambayo imekuwa ikiwatesa wakazi wa Ilemela kwa muda mrefu.
Mkazi wa Ilemela, Adolph Lwaima amesema kampeni za mtaa kwa mtaa zinawapa fursa ya kuwaona na kuwasikia wagombea wakati wana nadi sera zao hususani kwa wale ambao hawawezi kwenda kwenye mikutano ya hadhara.
“Kama sasa hivi nauza duka hapa. Siwezi kutoka kwenda furahisha labda nisubiri taarifa ya habari. Lakini ubunifu wa kututembelea nimeupenda wanatupa fursa ya kuwasikia na kuwaona,” amesema.