Pemba. Mgombea urais wa Zanzibar (ACT Wazalendo), Othman Masoud Othman amesema endapo akishika madaraka, utendaji wake wa kazi utawagusa maisha ya wananchi kwa kuwaondolea kodi kwenye bidhaa za vyakula vinavyotumika kila siku.
Othman amesema hivi sasa vyakula bei ghali visiwani humo, kwa sababu kuna tozo na kodi zinazosababisha wananchi kushindwa kumudu kununua.
“Chochote kinachohusu chakula, ACT Wazalendo tutakwenda kukiondolea kodi. Jambo la mwanzo watu wale chakula washibe. Tunachosema, ili kupunguza makali ya maisha ya wananchi ni kuondoa kodi kwenye kila kitu kinachohusu chakula tunachotumia kila siku,” amesema Othman.
Othman ameeleza hayo leo Ijumaa Oktoba 3,2025 akizungumza na wananchi wa Jimbo la Mtambile wilayani Mkoani, Mkoa wa Kaskazini Pemba katika mwendelezo wa kusaka kura za urais, kisiwani humo.
Mgombea huyo, amesema masuala mengine wameeleza katika mpango wa kukuza uchumi wa wananchi na maisha ya Wazanzibari, akisema anayetegemea kilimo, kuna hatua zitachukuliwa kwenye sekta hiyo ili kuleta unafuu.
“Anayevuna karafuu, tutakwenda kuziongeza zaidi ili zizalishwe zaidi. Nchi utasema unavyosema, uchumi wa Zanzibar ni rasilimali zake hasa karafuu, mwananchi lima karafuu sisi tutakwenda kukupa nyenzo bora ili kukuza uzalishaji,” amesema Othman.
Naibu Katibu Mkuu wa ACT Wazalendo (Zanzibar), Omar Ali Shehe amesema Othman ndio mgombea sahihi wa urais wa visiwa hivyo, hivyo Wazanzibari wamuunge mkono Oktoba 29.
“Huyu ndie mtu sahihi atakayesimama na kuitetea Zanzibar, tunahitaji kiongozi ambaye ameyaishi maisha ya Zanzibar na huyu si mwingine ni Othman Masoud. Wazanzibari tumpe kura zetu, huyu ndio mkombozi na tegemeo letu,” amesema.
“Othman ni mwaminifu, mwadilifu, asiyekuwa na tamaa, ameshika nafasi kubwa muhimu hapa Zanzibar hamjapata kusikia ameiba au kudokoa. Ingekuwa ameiba au kudokoa basi leo redio na luninga zingeiba wimbo huo,” amesema Shehe.