Dodoma. “Siku 100 za kwanza nikiapishwa kuwa mbunge, zitakuwa na mabadiliko makubwa kwenye ardhi Jimbo la Mtumba. Wananchi watazifurahia kwa kuwa ni lazima watu wamiliki ardhi kisheria, siyo kwa macho.”
Ni ahadi ya mgombea ubunge jimboni humo kwa tiketi ya Chama cha Mapinduzi (CCM), Anthony Mavunde.
Anasisitiza hayo yatafanyika iwapo wananchi watampigia kura Samia Suluhu Hassan kuwa Rais, na yeye kuwa mbunge na kata zote 20 za jimbo hilo kuwa na madiwani wa CCM.
Jimbo la Mtumba lenye kata 20 na mitaa 101, lilizaliwa kutoka Jimbo la Dodoma, ambalo awali lilikuwa na kata 41 na mitaa 222. Mtumba imetokana na heshima ya jina la Mji wa Serikali, ambao umebeba majengo ya wizara na taasisi.
Kata zinazounda Jimbo la Mtumba ni Msalato, Makutupora, Chihanga, Hombolo Bwawani, Hombolo Makulu, Ipala, Chahwa, Mtumba, Ihumwa, Nzuguni, Ipagala, K/Ndege, Miyuji, Makole, Viwandani, Tambukareli, Dodoma, Makulu, Iyumbu na Nghong’ona.
Jimbo hili lipo upande wa Mashariki mwa Jiji la Dodoma na ndilo linabeba taasisi nyingi za Serikali, yakiwamo majengo ya Bunge, Chuo Kikuu cha Dodoma (UDOM), Hospitali ya Benjamin Mkapa, Makao Makuu ya Jeshi la Wanananchi na Uwanja wa Ndege wa Msalato.
Katika mazungumzo na mgombea huyo, anabainisha kuwa anaugua kwa ajili ya maisha ya watu na anaona wivu mkubwa juu ya jimbo hilo, akitamani liwe la kupigiwa mfano nchini, na kuwa maisha ya watu lazima yabadilike.
Mavunde anazungumzia eneo la uwakilishi la jimbo hilo akisema alifanya vizuri lilipokuwa kubwa, hivyo sasa ni dogo haoni ni kwa nini ashindwe, akiahidi utumishi uliotukuka kwa wananchi na kuyaishi matatizo yao.
Anawaomba wananchi jimboni humo wakati wa kupiga kura Oktoba 29, 2025 zianze kwa Samia kwa nafasi ya urais, kwani ndiye kinara wa mambo mazuri yaliyofanyika Dodoma na yanayotarajiwa kufanyika jimboni Mtumba.
Mavunde anaieleza sekta ya ardhi kama donda ndugu kwa wananchi, lakini hajawahi kunyamaza kwa hilo na hatanyamaza.
Ni kutokana na hilo, anasema amesimamia na kuwezesha kupungua migogoro iliyokuwapo awali, akieleza ugawaji viwanja ilikuwa tatizo kubwa.
Amesema mpango wa kuwahamisha maofisa ardhi kutoka ofisini kuwapeleka maeneo ya wananchi ndiyo suluhisho, kazi inayoendelea kwa sasa katika baadhi ya maeneo yenye migogoro.
Sekta ya elimu
Ameahidi kuendeleza alipoachia, mpango ukiwa kuanzisha ujenzi wa shule za msingi na sekondari, ili Serikali iwakute wameshaanza.
Mavunde anasema tatizo litakuwa maeneo ya kujenga shule ili kuwasogeza huduma karibu watoto wasitembee umbali mrefu.
Vilevile, ameahidi kununua mashine za kudurufu mitihani ili kuwaondolea wazazi na walezi adha ya michango ya fedha ya kila Jumamosi, iliyogeuka kuwa kero.
Mbali ya hilo, ameahidi kupeleka viti vya mfano vya kukaa wanafunzi wa jimbo hilo ambavyo havipo katika shule yoyote Tanzania.
Sekta ya afya
Ndani ya jimbo la Mtumba lenye vituo vya afya vinne, anasema kuna haja ya kuviongeza ili kusogeza huduma karibu na wananchi.
Anasema katika kituo kikongwe cha Makole kunajengwa majengo ya ghorofa ili kukipanua na kukiongezea hadhi.
Mtumba itaongeza kasi ya ujenzi wa zahanati kwenye maeneo yenye uhitaji na kuziboresha zile za zamani, ili ziwe na hadhi kulingana na mazingira ya sasa.
Anasema ni mdau katika sekta hiyo, kwani kwa miaka mitano ya ubunge alipeleka madaktari jimboni ambao walitoa huduma, zikiwamo za macho bure na kugawa miwani zaidi ya 5,000.
Huduma ya maji
Kutokana na Jiji la Dodoma kuwa na upungufu wa maji, anasema kutokana na jitihada zake na maombi kwa Rais, kuna mpango wa kuchimba visima pembezoni kwa jiji, hatua anayosema “mambo mazuri yanakuja.”
“Mfano mzuri ni visima tulivyochimba Mtaa wa Nzuguni A, sasa tunakamilisha kufunga miundombinu ya kusambaza maji katika maeneo mengi ya jimbo la Mtumba na maeneo ya katikati, muda mchache watu wataacha manung’uniko, naomba siku ya kupiga kura wajitokeze kwa wingi kukichagua CCM, kwani mambo mazuri yanakuja,” anasema.
Anasema mpango wa usambazaji maji hautasubiri Novemba, isipokuwa wataalamu wanaendelea ili wananchi wazidi kufaidi matunda ya uongozi wa Serikali chini ya CCM.
Kuhusu masoko
Anasema ndani ya miaka mitano ya ubunge, kutajengwa soko la mbogamboga katika Mtaa wa Ihumwa, ili kupunguza msongamano na gharama za wananchi kwenda katikati ya jiji kwa biashara hiyo.
Soko hilo anasema litahudumia vijana wanaolima mbogamboga kutoka Ihumwa, Nzuguni, Mahomanyika, Mahoma Makulu, Hombolo na Iyumbu, ambako kwa miaka mingi wanafanya biashara kwa kutegemea wateja wanaozipeleka kwenye masoko ya Dar es Salaam.
Anaahidi nguvu itawekwa katika Soko la Sabasaba, analotaka livunjwe, liboreshwe kwa kujengwa upya ili wafanyabiashara wawe na uhuru wa kufanya biashara katika mandhari nzuri.
“Niliposema tunavunja, baadhi wakaingiza siasa, nasema ni bora wanichukie kwa kitambo lakini wanikumbuke hadi vizazi vyao, soko la Sabasaba litavunjwa na kupangwa upya, hakuna mtu atakayepoteza nafasi katika kipindi kifupi cha ujenzi wake,” anasema.
Anatoa mfano wa uboreshaji wa soko kuu la Majengo, akieleza kulikuwa na kelele lakini sasa watu wanafurahia namna linavyojengwa na kupangwa. Pia, anaona mafanikio katik asoko la Mavunde lililoko Chang’ombe ambalo aliliasisi na kulijenga.
Suala la mikopo
Mavunde anasema Halmashauri ya Jiji la Dodoma imetenga Sh7.6 bilioni kwa ajili ya mikopo ya asilimia 10 kwa vijana, wanawake na wenye ulemavu, lakini katika kampeni zake anahimiza watu wasikope holela.
“Wasiingie kichwakichwa wasije wakajuta,” anasema.
Mavunde kwenye harakati za kuomba kura Kata ya Nzuguni
Imani yake ni katika elimu ya fedha na mikopo, akiahidi kutumia wataalamu kutoa elimu kwanza kabla ya mikopo kwa wananchi ili watu waone faida ya kukopa na kurejesha fedha kwa faida ya wengine pasipo usumbufu.
Sekta ya michezo
Moja ya mambo aliyowekea mkazo kila mtaa alimopita ni michezo, akiahidi kuendeleza kampeni ya Mavunde Cup iliyoleta mafanikio ya kuibua vipaji vya vijana, baadhi sasa wanacheza Ligi kuu na daraja la kwanza.
Anasema kupungua kwa ukubwa wa jimbo kunakwenda kuboresha mashindano hayo ili kuwapa nafasi zaidi vijana.
Kwa nini Samia
Kwa uchache anataja mambo matano yaliyofanyika katika kipindi cha uongozi wa mgombea urais wa CCM, ambaye ni Rais anayemaliza muda wake, Samia Suluhu Hassan.
Mambo hayo ni ujenzi wa Uwanja wa Ndege Msalato, barabara ya mzunguko, vituo vya afya na Hospitali ya Wilaya Nala, miradi ya maji na maboresho ya miundombinu katikati ya jiji.
Anasema spidi yake inamfanya aamini ndani ya miaka mitano Mtumba na Tanzania zitakwenda mbio katika maendeleo.
Machozi hadharani
Alipotakiwa kujibu nini kilimliza Mei 15, 2025 jimbo lilipogawanywa, anasema hisia za wananchi alipowaaga baada ya hatua hiyo, akieleza ilikuwa vigumu kutamka hadharani upande anaohamia, hali iliyomuumiza alipoona wananchi wakilia naye akatokwa machozi.
Hata hivyo, Mavunde anasema atakuwa mwakilishi mzuri na kutoa ushirikiano kwa atakayechagulia jimbo la Dodoma. Hata huko, amewaomba wananchi wamchague mgombea ubunge wa CCM na madiwani wake.