London, England. Arsenal na Manchester United zimetumia vyema viwanja vyao vya nyumbani baada ya kuibuka na ushindi katika mechi za Ligi Kuu England zilizocheza leo Jumamosi, Oktoba 4, 2025.
Katika Uwanja wa Emirates, wenyeji Arsenal wameibuka na ushindi wa mabao 2-0 dhidi ya West Ham United ambao umewafanya wafikishe pointi 16.
Mabao hayo ya Arsenal katika mchezo huo yamefungwa na Declan Rice na Bukayo Saka, kila mmoja akifunga katika kila kipindi cha mchezo huo.
Kwa Saka, kufunga bao katika mchezo wa leo ni jambo la kihistoria kwake kwa vile mchezo huo ulikuwa ni wa 200 kwake kuicheza Arsenal katika Ligi Kuu ya England.
Hicho kimekuwa ni kichapo cha kwanza kwa Meneja Mpya wa West Ham, Nuno Espirito Santo ambaye mwanzoni mwa wiki hii alitangazwa kuwa mrithi wa Graham Porter.
Katika Uwanja wa Old Trafford, wenyeji Manchester United wameibuka na ushindi wa mabao 2-0 dhidi ya Sunderland.
Mabao yaliyopachikwa na Mason Mount na Benjamin Sesko yametosha kuipa Manchester United ushindi ambao umeifanya ifikishe pointi 10 na kupanda kwa nafasi sita katika msimamo wa Ligi hiyo kutoka ya 14 hadi ya nane.
Kwingineko, Tottenham Hotspur imepata ushindi wa mabao 2-1 ugenini kwenye Uwanja wa Elland Road.
Mathys Tel na Mohammed Kudus ndio wamefunga mabao ya Tottenham wakati bao la Leeds United likifungwa na Noah Okafor.