Marekani. Mwanamuziki nguli wa R&B, Toni Braxton, 57, anatarajiwa kuonekana katika filamu mpya inayotokana na wimbo wake maarufu, He Wasn’t Man Enough (2000), ikiwa ni sehemu ya mkataba wake mpya na kituo cha televisheni cha Lifetime.
Kwa mujibu wa Jarida la Deadline, Braxton, mkali wa kibao, Long As I Live (2018), amesaini mkataba wa kutengeneza filamu ambazo chimbuko lake litakuwa ni nyimbo zake maarufu zilizotamba miaka ya nyuma.
Chini ya mkataba huo, filamu ya kwanza kuzinduliwa itakuwa ‘He Wasn’t Man Enough’ ambayo Braxton ameigiza kama Mel Montgomery, mwandishi maarufu wa vitabu ambaye ameachwa na mpenzi wake Richard (Thomas Cadrot) aliyempenda sana.
Hali inazidi kuwa mbaya na kutatanisha pale anapogundua kuwa Richard amezama katika penzi jipya na Monica (Essence Atkins) ambaye ni rafiki yake wa zamani kipindi wanasoma chuo kikuu.
Filamu hiyo ambayo mwigizaji Yvette Nicole Brown pia ameshiriki, itarushwa kwa mara ya kwanza kupitia Lifetime mnamo Novemba 22, saa 2:00 usiku kwa saa za Marekani.
Hivyo, He Wasn’t Man Enough itakuwa miongoni mwa kazi nyingi kutoka kwa waigizaji wakali zitakazoonekana katika msimu mpya wa filamu ujulikanao kama ‘Love of a Lifetime’ utakaoruka kupitia kituo hicho.
Wimbo huo kutoka katika albamu ya tatu yake Braxton, The Heat (2000) ulifanya vizuri ukifika nafasi ya pili kwenye chati ya Billboard Hot 100, na kushika nafasi ya kwanza chati ya R&B/Hip-Hop kwa wiki nne mfululizo.
Filamu ya pili katika msimu huo itakuwa ‘Breathe Again’ ambayo inatokana na wimbo wa Braxton unaokwenda kwa jina hilo uliotoka mwaka 1993 katika albamu yake ya kwanza iliyoitwa Toni Braxton.
Breathe Again inasimulia maisha ya watu watatu wanaoshiriki katika kipindi cha televisheni cha kutafuta wapenzi (reality dating show) lakini kwa bahati mbaya hawafanikiwi kupata wenza wanaowahitaji.
Kufuatia kushindwa huko, wahusika hao wanahama kutoka Los Angeles na kwenda Seattle, huko wanakuwa marafiki wa karibu huku wakijitahidi kujenga upya maisha yao binafsi na ya kimapenzi.
Wimbo wa Breathe Again ulimpatia heshima kubwa Braxton wakati huo ukifika nafasi ya tatu chati ya Billboard Hot 100, na kubwa zaidi ukimpatia tuzo ya pili ya Grammy kama Mwimbaji Bora wa Kike wa RnB 1995.
Filamu zote mbili (He Wasn’t Man Enough na Breathe Again) zimetayarishwa na Toni Braxton pamoja na Tanya Lopez na Kenneth Crear kwa kushirikiana na Lifetime, huku Stan Brooks akiwa Mtayarishaji Mkuu wa miradi hiyo.