Mkutano wa nne wa mawaziri wa nchi wanachama wa Shirika la Ushirikiano wa Kiuchumi (ECO) umefanyika mjini Tehran, ukiwahusisha mawaziri na manaibu mawaziri wa mambo ya ndani wa nchi wanachama.
Kikao hiki kilifanyika baada ya takribani miaka 15 kupita bila mkutano wa aina hii. Mkutano ulifanyika siku za Jumatatu na Jumanne na kuhudhuriwa na Rais wa Jamhuri ya Kiislamu ya Iran, Masoud Pezeshkian, katika Ukumbi wa Mikutano ya Kimataifa wa Tehran.
Wawakilishi kutoka Pakistan, Tajikistan, Turkmenistan, Azerbaijan, Afghanistan, Kazakhstan, Kyrgyzstan, Uturuki, Uzbekistan na Iran walihudhuria, pamoja na Katibu Mkuu wa ECO، Waziri wa Mambo ya Ndani wa Oman na Naibu Waziri wa Mambo ya Ndani wa Iraq. Mkutano huu ulijadili masuala ya kuimarisha ushirikiano wa kiuchumi, masuala ya usalama, mapambano dhidi ya ugaidi, magendo na uhalifu wa kimataifa. Kikao hiki hakikuwa tu fursa ya majadiliano, bali kilikuwa pia hatua muhimu katika kuimarisha sera za kigeni za Iran na ushirikiano wa kikanda.
Mkutano wa mawaziri wa ECO unaonyesha kiwango cha uaminifu wa nchi wanachama kwa uwezo wa Iran katika uongozi wa diplomasia ya kikanda. Uwepo wa ujumbe wa ngazi ya juu kutoka nchi kumi unaonyesha nafasi ya Tehran katika mambo ya eneo na uwezo wa kuleta maelewano kati ya majirani. Mjadala wa mkutano ulijikita kwenye njia za kuongeza ushirikiano wa kiuchumi, kuimarisha miundombinu na kuendeleza maboresho ya usalama. Haya yanaweza kuongeza biashara kati ya nchi wanachama, kuvutia uwekezaji wa pamoja na kurahisisha utekelezaji wa miradi mikubwa ya kikanda. Kwa kutumia nafasi yake ya kijiografia, Iran inaweza kuwa kitovu cha uratibu wa masuala ya kiuchumi katika eneo.
Pamoja na malengo ya kiuchumi, ECO ina nafasi muhimu katika kuimarisha umoja wa kisiasa na usalama. Mkutano wa Tehran unaweza kuwa mwanzo wa mipango ya ushirikiano katika kukabiliana na changamoto kama ugaidi, uhalifu wa kimataifa na magendo. Ushirikiano huu unaweza kuongeza uthabiti wa eneo na kupunguza mgongano wa kijamii na kisiasa.
Mkutano wa mawaziri wa ECO mjini Tehran ni zaidi ya tukio la kidiplomasia. Ni ishara ya utulivu, uwezo na nia ya Iran katika kuimarisha usalama na maendeleo ya kikanda. Kikao hiki kinafungua fursa mpya za ushirikiano wa kiuchumi, kisiasa na kiusalama, na kinaimarisha nafasi ya Tehran kama mhimili wa ushirikiano katika eneo.
Mkutano huu unaweza kuongeza biashara ya kikanda, kuvutia uwekezaji wa pamoja, kuendeleza miundombinu ya mipakani na kuimarisha ushirikiano wa kiuchumi kati ya Iran na nchi wanachama. Iran inaweza kuongeza nafasi yake kwa kuboresha forodha, usafirishaji na taratibu za uingizaji na uuzaji bidhaa, jambo ambalo linaweza kupunguza gharama na kuongeza kasi ya biashara. Mkutano wa Tehran pia umetafuta njia za kutambua fursa za uwekezaji katika nishati, kilimo, usafirishaji na teknolojia.
Aidha, suala la kuimarisha miundombinu ya reli, barabara na bandari limetajwa kama kipaumbele cha uchumi wa ECO. Kwa nafasi yake ya kijiografia, Iran inaweza kuwa njia kuu ya usafirishaji wa mizigo katika eneo na kupata faida za uchumi wa usafirishaji. Vilevile, matumizi ya teknolojia mpya kama akili mnemba katika usimamizi wa mipaka yamejadiliwa kama njia ya kupunguza gharama na kuongeza ufanisi katika sekta mbalimbali. Pendekezo la kuanzisha sarafu ya pamoja ya ECO limetajwa kama mpango wa muda mrefu ambao unaweza kupunguza gharama za biashara na kupunguza utegemezi wa sarafu za kimataifa.
Kwa ujumla, mkutano wa mawaziri wa ECO mjini Tehran unaweza kuwa hatua muhimu katika kuimarisha ushirikiano wa kikanda na unaweza kuwa na faida kubwa katika uchumi, siasa na usalama kwa Iran na nchi wanachama.