Polisi nchini DRC imetangaza kuimarishwa kwa msako dhidi ya magenge yanayoitwa “Kuluna” katika mji mkuu wa nchi hiyo, Kinshasa. Operesheni “Kanga Kanga” (“kukamatwa bila huruma”) inakuja huku kukiwa na ongezeko la kutisha la uhalifu katika jiji kubwa lenye wakazi takriban milioni 20.
Imechapishwa: Imehaririwa:
Dakika 1 Wakati wa kusoma
Matangazo ya kibiashara
Na mwandishi wetu huko Kinshasa, Pascal Mulegwa
Operesheni hii inalenga kuimarisha msako uliozinduliwa zaidi ya mwezi mmoja uliopita, na huku matokeo yake yakizua utata. Ishara ya kuimarishwa huku ilitolewa wakati wa gwaride kubwa lililofanyika siku ya Ijumaa, Oktoba 31, 2025, katika Uwanja wa Mashujaa.
Polisi wa Jamhuri ya Kidemokrasia ya Kongo wametangaza kuimarishwa kwa msako wa “Kuluna,” majambazi ambao mamlaka haijaweza kuangamiza.
Maafisa zaidi ya elfu moja wa polisi wamehamasishwa kupokea maagizo mapya kutoka kwa mkuu wa polisi wa Kinshasa, Israel Kantu, kuhusu usalama wa umma. Dhamira yao itakuwa kurejesha udhibiti wa vitongoji ambapo mashambulizi, wizi, na vitisho vinaongezeka.
Operesheni hii kubwa, ambayo inakuja baada ya operesheni zingine ambazo zinaendelea kwa wiki kadhaa, inatofautishwa na mbinu yake ya moja kwa moja zaidi. Vikosi vya usalama sasa vitaendesha operesheni hiyo kitongoji kwa kitongoji, nyumba kwa nyumba, ili kutambua na kuwaangamiza wanachama wa magenge yanayojulikana.
Mamlaka inaahidi kukomesha maeneo yasiyo na sheria ambayo yanachafua taswira ya mji mkuu na kuchochea hisia ya kutokuwa na usalama inayoendelea.
Operesheni inayoibua wasiwasi
Lakini raia hawana imani na operesheni hii. Mashirika ya kiraia yana hofu ya kutokea kwa vitendo vya unyanyasaji, yana wasiwasi kwamba ukandamizaji dhidi ya majambazi unaweza kusababisha mauaji ya kiholela au watu kukamatwa kiholela. Yametangaza kufuatilia kwa karibu kwa operesheni hiyo.
Sikukuu za mwisho wa mwaka zinapokaribia, mamlaka inatumaini kwamba operesheni hii iliyoimarishwa itahakikisha amani na usalama kwa wakazi wa Kinshasa na kurejesha imani ya raia waliochoka na vurugu za kila siku ambazo mamlaka hazijaweza kuzidhibiti kwa miaka mingi.