Uingereza na Ujerumani yalikuwa mataifa ya awali kabisa miongoni mwa kundi hilo la G7 kutoa ahadi ya kuchukuwa hatua kubwa zaidi kuisaidia Ukraine na kuishinikiza Urusi wakati mawaziri wao wa mambo ya kigeni walipokuwa njiani kuelekea Niagara kwa mkutano huo.
Akitangaza uamuzi huo, Waziri wa Mambo ya Nje wa Uingereza, Yvette Cooper, alisema nchi yake ingelitangaza hatua kali zaidi dhidi ya usafirishaji wa gesi ya Urusi kwa mwaka ujao ili kuishinikiza Moscow kukomesha vita vyake nchini Ukraine.
Hatua hizo zitajumuisha marufuku ya kutumia huduma za usafiri wa bahari za Uingereza kwa gesi hiyo kama vile bima na usafirishaji wa meli.
Uamuzi huo, kama ukitekelezwa utazuwia huduma zozote za Uingereza kutumika kusafirisha gesi ya Urusi kuelekea nchi ya tatu.
Tayari Uingereza yenyewe ilishapiga marufuku kuingiza gesi ya Urusi tangu mwaka 2023.
Waziri huyo wa mambo ya kigeni alitangaza pia kwamba nchi yake itatowa msaada mwengine wa paundi milioni 13 kwa ajili ya kukarabati miundombinu ya nishati ya Ukraine wakati huu majira ya kipupwe yakianza.
Ujerumani yaongeza msaada
Kwa upande wake, Waziri wa Mambo ya Nje wa Ujerumani, Johann Wadephul, alitangaza msaada mwengine wa euro milioni 40 pia kwa ajili ya miundombinu ya nishati ya Ukraine.
Akizungumza nchini Bolivia kabla ya kupanda ndege kuelekea Niagara kwa mkutano huo wa mawaziri wa kigeni wa kundi la G7, Wadephul alisema nchi yake ingeliendelea kuisaidia Ukraine.
“Tunawasaidia watu wa Ukraine kukabiliana na majira mengine ya baridi kali wakati wa vita. Tunawasaidia waweze kuwasha taa zao na mashine za joto, na tunawasaidia kuizuwia Urusi na mashambulizi yake ya kigaidi dhidi ya miundombinu ya gesi yasivunje moyo wa wale wanaotetea nchi yao.” Alisema.
Hata hivyo, mwenyeji wa mkutano huo, Waziri wa Mambo ya Nje wa Kanada, Anita Anand, alijizuwia kutoa ahadi ya moja kwa moja juu ya kile mkutano huo ungeafikiana kuhusu Ukraine.
Badala yake aliwaambia waandishi wa habari kwamba kwa nchi yake jambo la muhimu lilikuwa ni “kusimamia mazungumzo ya kimataifa,” hasa katika wakati huu ambapo dunia inakabiliwa na kile alichokiita “mazingira tete na changamano.”
Wanadiplomasia hao wa ngazi za juu wanakutana baada ya Rais Donald Trump wa Marekani kuziwekea vikwazo kampuni mbili kubwa za mafuta za Urusi, akimshutumu Rais Vladimir Putin kwa kukataa kwake kuvimaliza vita vya Ukraine.
Mbali ya Ujerumani na Uingereza, kundi hilo la mataifa ya G7 linazijumuisha Ufaransa, Italia, Japan, mwenyeji wa mkutano huu, Kanada, na Marekani. Waziri wa Mambo ya Nje wa Ukraine, Andrij Sybiha, alitazamiwa pia kuhudhuria mkutano huo.
Mkutano huo umewaalika wawakilishi kutoka Saudi Arabia, India, Brazil, Australia, Afrika Kusini, Mexico na Korea Kusini.