Katika taarifa, Turk amesema kuna jaribio la dhahiri la kuficha ushahidi kufuatia ripoti kwamba polisi wa Tanzania walikuwa wakichukuwa miili kutoka vyumba vya kuhifadhia maiti hadi maeneo ambayo bado hayajafichuliwa na akahimiza mamlaka kutoa miili kwa familia za waliopoteza watu wao kwa ajili ya mazishi.
Taarifa hiyo imetaja “mamia” ya watu wanaoaminika kuwa wameuawa, lakini imesema imeshindwa kuthibitisha kwa uhuru takwimu za majeruhi kutokana na hali tete ya usalama na kufungwa kwa mtandao wakati wa uchaguzi
Ofisi hiyo ya Umoja wa Mataifa pia imetoa wito wa kuachiliwa huru bila masharti kwa
viongozi wote wa chama cha upinzani ambao wamekamatwa, akiwemo kiongozi wa chama cha Chadema, Tundu Lissu, ambaye kesi yake ya uhaini iliahirishwa Jumatatu kutokana na kile kilichotajwa na mwendesha mashtaka kuwa masuala ya kiusalama.
Wakati huo huo, akizungumza wa njia ya video kutoka Nairobi, Kenya, msemaji wa Ofisi hiyo ya Haki za Kibinadamu ya Umoja wa Mataifa Seif Magango, alitoa wito wa uchunguzi wa haraka wa mauaji na ukiukwaji mwingine unaofanywa katika muktadha wa uchaguzi nchini Tanzania.
”Kuna ripoti za kutia wasiwasi kwamba mamia ya waandamanaji na watu wengine wameuawa, na idadi isiyojulikana wamejeruhiwa au kuzuiliwa, na kwamba vikosi vya usalama vimeonekana vikiondoa miili kutoka mitaani na hospitali na kuipeleka kwenye maeneo yasiyojulikana, katika jaribio la kuficha ushahidi.”
Mamlaka Tanzania yatakiwa kutoa miili ya waliouawa katika maandamano
Magango pia ameihimiza mamlaka nchini Tanzania kutoa taarifa kuhusu hatma na mahali walipo watu wote waliopotea, na miili ya waliouawa kukabidhiwa kwa wapendwa wao ili izikwe kwa heshima.
Akizungumzia wito huo wa Umoja wa Mataifa, mchambuzi wa masuala ya kisiasa nchini Tanzania Gwandumi Mwakatobe ametilia mashaka ikiwa kweli wito uliotolewa unaweza kutekelezwa
Upinzani nchini Tanzania unasema kuwa zaidi ya watu elfu 1 waliuawa wakati wa ghasia hizo za uchaguzi.