Katika mkutano huo, wajumbe wa Kiafrika wanatarajiwa kushinikiza ajenda ya tabianchi inayozingatia haki, usawa na ustahimilivu.
Afrika pia itadhihirisha uwezo wake mkubwa wa nishati mbadala, na ubunifu unaoendeshwa na vijana, huku ikidai mageuzi ya maana katika ufadhili na usimamizi wa masuala ya tabianchi duniani.
Katika jamii ya Yiwagu, kaskazini mwa Ghana, kilimo kimekuwa uti wa mgongo kwa muda mrefu.
Hata hivyo, katika miaka ya hivi karibuni, mazao — hasa karanga za shea — yamepungua, wenyeji wakilaumu hali hii kutokana na mvua zisizo na utaratibu, na kuongezeka kwa joto, dalili kuu za mabadiliko ya tabianchi.
Kama njia ya kukabiliana na changamoto hizo, viongozi wa eneo hilo wamepiga marufuku ukataji miti na shughuli nyingine hatarishi katika misitu, na jamii hiyo ndogo kimaeneo imegeukia mbinu za jadi za uhifadhi wa mazingira.
Yakubu Iddrisu, mjumbe wa Yiwagu, anasema “msitu unalinda jamii yao kutokana na upepo mkali, unasaidia mvua kunyesha, na pia ni chanzo cha dawa za asili wanazotumia.”
Iddrisu aliieleza DW kwamba manufaa ya juhudi hizo tayari yanaonekana kwani hali ya hewa imeanza kuwa bora, na msitu umeanza tena kuwa chanzo cha uponyaji.
Njia za kunusuru mazingira kwa ngazi ya jamii
Katika kijiji cha Bachabodo, pia kaskazini mwa Ghana, wakazi — hasa wanawake — hapo awali walitegemea kuni kwa kupikia na uchomaji mkaa kama chanzo cha kipato, jambo lililosababisha ukataji miti mkubwa.
Lakini hali imebadilika kwa sababu wanawake sasa wamegeukia ufugaji wa nyuki kama njia endelevu ya kujipatia kipato, wakisaidiwa na mpango wa Global Landscapes Forum, wa Umoja wa Mataifa wa REDD unaoelenga kupunguza Utoaji wa Gesi Chafu kutokana na Ukataji na Uharibifu wa Misitu, na Jukwaa la Misitu Afrika (African Forest Forum).
Grace Mawaldujin, mfugaji wa nyuki kutoka Bachabodo, anasema, “sasa kupitia asali, wanapata pesa za kujikimu — mabadiliko ambayo yamebadilisha maisha yao.”
Kusini zaidi, wakulima wanaanza kutumia mbinu za kilimo kinachohimili mabadiliko ya tabianchi ambazo hupunguza utegemezi wa misitu na kuhimiza upandaji miti.
Katika maeneo ya kilimo cha kakao kama Atiwa, mashariki mwa Ghana, miti inapandwa kutoa kivuli kwa mazao ya kakao — jambo linaloongeza mavuno na kuboresha maisha ya wakulima.
“Hapo awali tulikuwa tunavuna mifuko michache ya kakao, lakini sasa tangu tuanze kutumia mbinu za kilimo kinachozingatia tabianchi, tunapata mavuno mengi zaidi. Hii imepunguza umaskini katika eneo letu,” alisema Collins Akonnor, mkulima wa kakao wa eneo hilo.
Ivy Ashiley kutoka timu simamizi ya kitaifa ya REDD+ nchini Ghana anasema, “lengo ni kuzuia upanuzi wa mashamba ya kakao ndani ya maeneo ya misitu na pia kupanda miti katika mashamba ya kakao ili kuboresha mavuno, jambo ambalo linapunguza ukataji miti na uharibifu wa misitu.
Wakulima wengi sasa wanalima ndani ya maeneo yao na hata wanapanda miti zaidi, jambo ambalo pia linaboresha mavuno.”
Ingawa Afrika ni moja ya wachangiaji wadogo zaidi wa utoaji wa gesi chafu duniani, bara hili bado ndilo linaloathirika zaidi na mabadiliko ya tabianchi.
Wataalamu wanasema juhudi za jamii nchini Ghana zinatoa mfano bora wa kuigwa na bara lote.
Wanasema zaidi ya majukwaa ya kimataifa, wapiganaji halisi wa vita dhidi ya mabadiliko ya tabianchi wako katika jamii kama Yiwagu, Bachabodo na Atiwa — ambako maarifa ya asili na hatua za wenyeji zinafanya mapambano haya kuwa halisi, jumuishi na yenye matokeo.