Taarifa iliyotolewa na mkuu wa kanisa hilo la KKKT, Askofu Alex Malasusa imebainisha pamoja na kuelezea kuguswa kwa kanisa na matukio jumla yaliyolikumba taifa wakati wa uchaguzi huo, lakini pia limevitaka vyombo vya dola, serikali pamoja na vyombo vya utoaji maamuzi kutenda haki.
Limewahimiza waumini wake kuanzisha maombi ili kuwagusa wale waliofikwa na madhila hayo huku likitoa mwito kwa vyombo vya dola kujiepusha na matumizi ya nguvu kupita kiasi wakati vinapotekeleza majukumu yake.
Limesema maombi hayo yanayoanza Jumapili ya Novemba 16 hadi Novemba 23 na yamegawanyika katika makundi mbalimbali ikiwamo kuwaombea viongozi kutambua wajibu wao wa kutenda haki.
Naye Katibu Mkuu wa KKKT, Rogath Mollel ameiambia DW kuwa kanisa hilo linawajibika kutekeleza majukumu yake ya kiimani na kwamba lilianza maombi kwa taifa tangu ilipoanza kujitokeza hali ya sintofahamu wakati wa uchaguzi wenyewe.
Aidha, Mollel amesema kanisa hilo linakusudia kufanya jambo maalumu siku ya mwisho ya kuhitimisha maombi hayo.
Katika hatua nyingine Jumuiya ya Kikistro Tanzania (CCT), imetoa wito kufanyika maombi ya toba ya kitaifa yakijumuisha makundi ya watu wote kuomba kuhusu yale yaliyotokea wakati na baada ya uchaguzi mkuu.
Mwenyekiti jumuiya hiyo, Askofu Stanley Hotay amesema hatua hiyo inalenga kulileta taifa pamoja.
CHADEMA kutoa msaada wa kisheria kwa waathirika
Wakati huo huo, chama cha upinzani nchini Tanzania CHADEMA, kimetangaza kuwasambaza mawakili wake kote nchini kuwatetea wananchi wanaokabiliwa na kesi za uhaini mahakamani, baada ya maandamano yaliyofanyika wakati wa uchaguzi mkuu wa Oktoba 29.
Makamu mwenyekiti wa chama hicho, John Heche anasema mawakili hao wamepewa jukumu la kutoa msaada wa kisheria kwa watuhumiwa na kwamba kazi hiyo inaanza kufanywa mara moja.
Katika hatua nyingine, chama hicho kimeupongeza wito uliotolewa na Umoja wa Mataifa uliohimiza kufanyika uchunguzi wa kina kufuatia kuwepo ripoti ya mamia ya wananchi waliouwawa wakati wa maandamano yaliyofanyika katika majiji mbalimbali ya Tanzania wakati wa uchaguzi.