Rais Herzog ameyaelezea mashambulizi hayo kuwa ya “kushtua na makubwa”, akipaza sauti adimu na yenye nguvu kwa ukosoaji uliofumbiwa macho na maafisa wakuu wa Israel kuhusu ghasia za walowezi. Rais huyo ameongeza kwa kusema kwamba vurugu hizo zilizofanywa na kundi la watu wachache “wahalifu” zimekwenda mbali, na kuzitaka mamlaka zote za serikali zichukue hatua madhubuti ili kutokomeza jambo hilo.”
Matamshi yake na yale ya maafisa wawili waandamizi wa kijeshi, yanatolewa baada ya dazeni ya Walowezi wa Kiyahudi waliokuwa wamevalia barakoa usoni, kuvishambulia vijiji vya Kipalestina vya Beit Lid na Deir Sharaf katika Ukingo wa Magharibisiku ya Jumanne na kuchoma moto magari na mali nyinginezo kabla ya kukabiliana na wanajeshi wa Israel.
Waziri wa Mambo ya Nje wa Marekani Marco Rubio amezungumzia ghasia hizo akisema zinaweza kutibua juhudi za amani zinazoungwa mkono na Washington huko Gaza. Rubio alitoa kauli hiyo mara baada ya mkutano wa mawaziri wa kundi la nchi saba zilisostawi kiviwanda G7 huko nchini Canada.
Katika hatua nyingine mwandiplomasia huyo mkuu wa Marekani amesema ana matumaini kwamba Baraza la Usalama la Umoja wa Mataifa litakamilisha azimio juu ya Gaza, litakalounga mkono kikosi cha usalama cha kimataifa.
“Tuna rasimu mpya ambayo inafanyiwa kazi sasa. Tuna matumaini kwamba itafanikiwa na inahitaji kufanywa kwa njia sahihi. Na ni wazi kuna nchi nyingi tofauti kwa hiyo ni lazima uangalie maslahi yao kwa jinsi ilivyopangwa, zaidi tu ya kikosi cha usalama. Kwa hiyo nafikiri tunapiga hatua katika suala la lugha ya rasimu na natumai tutachukua hatua hivi karibuni. Hatutaki kupoteza kasi katika hili,” alisema Herzog.
Wiki iliyopita Marekani ilianza kusambaza rasimu ya azimio hilo ambalo litafuatilia usitishaji mapigano uliosimamiwa na Rais Donald Trump katika vita vya miaka miwili.
Na huko jijini New York, Israel ilihojiwa siku ya Jumanne na Jumatano na Kamati ya Umoja wa Mataifa inayofuatilia mateso, juu ya ripoti tofauti zinazodai kuteswa kwa wafungwa wa Kipalestina, hususan tangu shambulio la Hamas la Oktoba 7, 2023.
Mwandishi wa kamati hiyo Peter Vedel Kessing amesema, “kamati imeshtushwa sana na maelezo ambayo yamepokelewa, katika idadi kubwa ya kile kinachoonekana kuwa mateso na unyanyasaji wa kimfumo wa Wapalestina, wakiwemo watoto.”
Kamati hiyo dhidi ya mateso inawajumuisha wataalamu 10 huru ambao wanafuatilia utekelezaji wa Mkataba dhidi ya Mateso na Unyanyasaji au Adhabu nyingine za kikatili au zile za kushusha hadhi kutoka kwa nchi wanachama.